Ил Түмэн пленарнай мунньаҕынан бигэргэтиллэн, үп миниистирэ Валерий Жондоров дуоһунаһыгар хаалла. Кини миниистиринэн 2012 с. үлэлиир.
Валерий Алексеевич миниистиринэн ананыан иннинэ казначействоҕа, бааннарга, инвестиционнай тэрилтэлэргэ үлэлии сылдьыбыта. Электроннай техника Москватааҕы институтугар, Үлэ уонна социальнай сыһыан академиятыгар, РФ Судаарыстыбаннай сулууспа академиятыгар үөрэммитэ.
Кини миниистиринэн үлэлиир кэмиттэн өрөспүүбүлүкэ бүддьүөтү таҥыытыгар балай да уларытыылар киирдилэр. Ол курдук, Саха сирэ биир бастакынан бүддьүөтү бырагырааманан, тус сыаллаах тыырыыга киирбитэ. Бүддьүөт систиэмэтин портала оҥоһуллубута.
Ил Дархан Айсен Николаев бэлиэтииринэн, үп миниистирэ бу кэлэр сылларга өрөспүүбүлүкэ бүддьүөтэ туруктаах буолуутугар күүскэ үлэлэһиэхтээх. Манна бүддьүөт үлэһиттэригэр хамнаһы төлөөһүн, нэһилиэнньэ туруктаах буолуута, национальнай бырайыактары олоххо киллэрии, ону сэргэ судаарыстыбаннай иэс нуорма иһинэн сылдьыыта барыта учуоттаныллыахтаах.
Ыспыраапка:
Жондоров Валерий Алексеевич
1961 с. кулун тутар 31 күнүгэр Дьокуускайга төрөөбүтэ;
1984 с. Москватааҕы электроннай техника институтун үөрэнэн бүтэрбитэ;
1984-1992 сс. – ССРС НА СС Космофизическэй чинчийии уонна аэрономия институтун старшай лаборана, научнай үлэһитэ;
1992-1993 сс. – “Сахаинвест” чековай инвестиционнай фонда сүрүннүүр исписэлииһэ;
1993-1994 сс. – “Сахаинвест-сервис” хампаанньа кылаабынай исписэлииһэ;
1994-1996 сс. – “Сахабилиибанк” отделын салайааччыта, вице-президенэ-управление начальнига;
1996-1998 сс. – үп миниистирин солбуйааччы, управление салайааччыта;
1998-1999 сс. – “РА УФОР Якутии” коммерческайа суох тэрилтэ салайааччыта;
1999-2000 сс. – “Восток-капитал” САУо генеральнай дириэктэрин солбуйааччы;
2000-2005 сс. – Үп министиэристибэтин кылаабынай казначейа, миниистири солбуйааччы;
2006-2012 сс. – “РФА Инвест” консультана, генеральнай дириэктэрэ;
2012 с. – СӨ үбүн миниистирэ.
Аграфена КУЗЬМИНА, “Саха сирэ” хаһыат.