close
podpiska

Варя Максима: Бурдук, эт аһы сиэбэппин
· - Итии чэй - Олох-дьаһах

Варя Максима: Бурдук, эт аһы сиэбэппин

Хас биирдии саха киһитэ бэйэтэ сөбүлээн истэр ырыаһыттаах. Кини ырыаларын, айымньыларын, ситиһиилэрин, тус олоҕун барытын кэтээн көрөр. Ол курдук, мин эстрадаттан биир сөбүлээн истэр уонна айар үлэтин мэлдьи кэтээн көрөр киһибинэн Саха сирин култууратын туйгуна, “Звезды Туймаады” сурунаал сүрүн эрэдээктэрэ, “Якутяночка” салон хаһаайката, эстрада ырыаһыта Варя Максима буолар.

Натали Протопопова, edersaas.ru

Варя билигин аҥаардас ырыанан эрэ үлүһүйбэт. Кини салайан таһаарар “Звезды Туймаады” сурунаалын үгүс дьон сөбүлээн ааҕар. Ону таһынан, Варя икки оҕо күн-күбэй ийэтэ, тапталлаах кэргэн, билиҥҥи олоххо биир саамай ситиһиилээх, аныгы олоҕу кытта тэҥҥэ хаамсар киһи диэтэхпинэ, ким да мэлдьэспэт буолуохтаах.

Сотору кэминэн, кулун тутар 31 күнүгэр, П.А. Ойуунускай аатынан Саха тыйаатырыгар Варя Максима “Кэрэ ырыа” диэн ааттаах айар үлэтин 20 сылыгар аналлаах айар кэнсиэрэ буолаары турар. Төһө да бэлэмнэнии сүпсүлгэнэ буоллар, бу күннэргэ Варялыын “Алоха” кафеҕа көрсөммүт, олус үчүгэйдик сэһэргэстибит.

Сурунаал үлэтин олус сөбүлээтим

– Варя, үтүө күнүнэн! Аан бастаан эн дьоҥҥо-сэргэҕэ ырыаһыт быһыытынан биллибитиҥ. Оттон иллэрээ сыл “Звезды Туймаады” диэн сурунаал аспытыҥ. Хайдах маннык соһуччу быһаарыммыккыный? Арааһа, сүгүрүйээччилэриҥ соһуйбут буолуохтаахтар…

– Үтүө күнүнэн! Мин урут, өссө оскуолаҕа үөрэнэ сылдьан, суруналыыс буолуохпун баҕарар этим. Ол гынан баран олоҕум атыннык салаллан, музыкальнай үөрэҕи баһылаан култуура, эстрада эйгэтигэр барбытым. Үс сыллааҕыта “Дохсун” концертнай агентство дириэктэрэ, суруналыыс үөрэхтээх доҕорум Михаил Батюшкин бииргэ сурунаал арыйыахха диэбитэ. Мин ону, хаһан да сурунаал туһунан толкуйдаабатах киһи, аан бастаан олус соһуйа, дьиибэргии иһиттим. Ол гынан баран, доҕорбор Мишаҕа итэҕэйэр буоламмын, күүспүтүн холбоон, сыал-сорук туруорунан, 2015 сыл саҕаланыыта былааммытын тута олоххо киллэрбиппит. Аан бастаан саҕалыырбытыгар сурунаал хайысхатын, туохха олоҕуруохтааҕын билбэт этибит. Ол эбэтэр, араас эйгэни барытын хабан үлэлиэхпит дии санаабыппыт. Кэмниэ-кэнэҕэс толкуйдаан бараммыт, биһиги саамай чугастык билэр эйгэбит эстрада, култуура буоллаҕа дии санаабыппыт. Онон, эстрада, култуура эйгэтин үлэһиттэрин киэҥник, аһаҕастык уонна чиэһинэйдик арыйарга сананан, күн бүгүнүгэр диэри ол хайысхаҕа үлэлии сылдьабыт. Сурунаал эрэдээктэринэн Миша Батюшкин сыл устата үлэлээбитэ. Былырыын кини бүппүтэ. Ол кэмтэн ыла мин эрэдээктэрдиибин.

– Эн сурунаалы харчы киллэрэр бизнес курдук көрөҕүн дуу эбэтэр идеяларгын олоххо киллэрэҕин дуу?

– Сурунаалга үлэлиир олус интэриэһинэй эбит. Сөбүлээбэтим буоллар, маннык үлэлии сылдьыам суоҕа этэ. Аны туран, ааҕааччылар куттарын тутта — дьон номнуо кэтэһэр. Бизнес чааһын эттэххэ, сөбүлүүр үлэм син биир харчы киллэрэр. Ол гынан баран мин куруук харчыны эрэ саныы-саныы үлэлээбэппин.

Люба Готовцевалыын

– Айар хамаандаҕын хайдах тэриммиккиний?

– Сурунаалга суруналыыстар Лиза Газизова уонна Люба Готовцева айымньылаахтык үлэлииллэр. Биһиги култуура, эстрада эйгэтигэр ситиһиилээхтик үлэлии сылдьар дьону кытта аһаҕастык кэпсэтэбит, кинилэр олохторун хайдах баарынан чиэһинэйдик кэпсиибит. Лиза уонна Люба наһаа үчүгэйдик суруйаллар, дьону сөпкө арыйаллар. Онон, мин кинилэргэ олус махтанабын.

– Сурунаал үлэтэ олус элбэх бириэмэни эрэйэр. Ыллыыргар мэһэйдээбэт дуо?

– Мэһэйдээбэт. Ырыаһыт быһыытынан мин үлэлээбитим ыраатта. Бу сыллар тухары элбэхтик гостуруоллаатым, айаннаатым, ааппын-суолбун оҥоһуннум. Билигин кэнсиэртэргэ, бырааһынньыктарга ыҥырдахтарына, хаһан баҕарар баран ыллыыбын. Онон бу икки үлэм бэйэ-бэйэлэригэр мэһэйдэспэттэр.

Оҕолору кытта үлэлиирбин сөбүлүүбүн

– Варя, эйигин ааспыт сайын ырыа лааҕырын арыйан үлэлэппит дииллэр. Ити кырдьык дуо?

– Суох, мин хаһан да лааҕыр арыйа иликпин. Ол гынан баран, оҕолору кытары үлэлиир уопуттаахпын. Былырыын дьүөгэбиниин Люба Готовцевалыын Нам улууһун II Хомустааҕар “Звездочки Туймаады” диэн ааттаах ырыа устуудьуйатын арыйан үлэлэппиппит. Бэйэм музыкальнай үөрэхтээх киһи буоларым быһыытынан, оскуола оҕолорун ырыаҕа, вокалга, сөпкө ыллыырга үөрэппиппит. Люба иллэрээ сыл Чурапчы улууһун Мындаҕаайытыгар “Кустук” оҕо ырыа лааҕырын үлэлэтэ сылдьыбыта. Онон бу эйгэҕэ кини үлэлиир уопуттаах. Быйыл сайын Любалыын өссө да лааҕыр туһунан толкуйдуубут.

– Бырастыы гын, оттон билигин лааҕыр, устуудьуйа арыйар артыыс олус элбэх ээ. Клим Федоров, Варя Аманатова, Саина, Сахаайа о.д.а. Илин-кэлин былдьаһыы баар буолуо дии санаабаккын дуо?

– Оннук диэн буолбатах. Билигин Дьокуускайга төһөлөөх элбэх маҕаһыын баарый? Син биир маҕаһыыннар арыллаллар, сурунааллар бааллар, биһиги эмиэ сурунаал таһаардыбыт. Лааҕыр элбэҕэ биһиги үлэбитигэр төрүт мэһэйдээбэт. Хас биирдии төрөппүт оҕотугар сөптөөх хайысханы талан ылар.

– Эйигин өссө кэлиҥҥи кэмҥэ Арассыыйа ырыаһыттарын кэнсиэртэрин тэрийэр киһи быһыытынан билэбит. Эн санааҕар, Арассыыйа ырыаһыттара хайдах эбиттэрий? Төһө хаппырыыстарый? Саха сирин төһө интэриэһиргииллэрий?

– Биһиги Миша Батюшкинныын Вера Брежнева, Шура, Света курдук ырыаһыттар кэнсиэртэрин тэрийбиппит. Бу ыҥырбыт артыыстарбыт элэккэй, боростуой майгылаахтар этэ. Дьокуускайга үчүгэй кэнсиэртэри бэлэхтээн барбыттара. Күн бүгүнүгэр диэри дьон ону өйдүүр. Саха сирин интэриэһиргииллэр, өссө да кэлиэхтэрин сөп.

 

Киһи бэйэтин таптыахтаах

– Варя, билигин кэрэ аҥаардарга сөптөөх аһылык, диета, спорт муода буолла. Эн бэйэҕин төһө көрүнэҕиний? 

– Мин билигин Дьокуускайга “Sun-club” кулуупка тренажернай саалаҕа дьарыктанабын. Нэдиэлэҕэ биэстэ сылдьабын. Дьон хараҕын далыгар сылдьар киһи буоларым быһыытынан, бэйэбин көрүнүөхпүн наада. Аспын-үөлбүн эмиэ тутуһа сатыыбын. Дьиэ кэргэммэр иҥэмтиэлээх астары астыыбын. Соторутааҕыта бурдук астан уонна эттэн аккаастанным.

– Ханнык фирма косметикатынан туттаҕын?

– Чопчу биир фирманан эрэ туттубаппын. Миэнэ барыта араас. Сөбүлүү көрбүппүн куруук ылабын.

Варя дьиэ кэргэнэ

– Эн икки оҕо ийэтэҕин. Үлэҕин уонна дьиэ кэргэҥҥин хайдах дьүөрэлиигин?

– Мин ханнык да тэрилтэҕэ эрэсиимнээх үлэҕэ үлэлээбэппин. Онон күммүн-дьылбын барытын бэйэм былааннанабын. Сарсыарда ойон туран оҕолорбун оскуолаҕа атаарабын, онтон эбиэккэ диэри дьиэбэр олорон сурунаалым үлэтинэн дьарыктаныахпын сөп. Эбиэттэн киэһэ наадаларбынан сылдьабын, кэллиэгэлэрбин, доҕотторбун кытта көрсөбүн. Нэдиэлэ бүтүүтэ кэнсиэртэргэ, араас тэрээһиннэргэ ыллыы барабын. Үлэбин уонна дьиэ кэргэммин холкутук дьүөрэлиибин. Оҕолорум улаатаннар олус үчүгэй, бэйэлэрин көрүнэллэр. Кыыһым 10-с кылааска үөрэнэр. Номнуо улаатан көмөтө баһаам, ас астыырын сөбүлүүр. Кэргэним мин идэбин уруккуттан өйдүүр, үлэбин, бизнеспын мэлдьи өйүүр. Онон мин киниэхэ махталым сүрдээх улахан.

– Омук сирдэригэр сынньанаргын олус сөбүлүүгүн быһыылаах дии?

– Оннук. Дубайга, Турцияҕа, Грецияҕа, Вьетнамҥа, Кытайга, Египеккэ, Индияҕа о.д.а. сирдэргэ сынньаммытым. Кыраныысса таһыгар, киэҥ сирдэринэн тэлэһийэ көтөр, сынньанар наһаа үчүгэй, киһи өйдүүн-санаалыын, дууһалыын байар. Сылаас дойдуларга күһүн уонна кыһын эрэ барарга быһаарынным. Тоҕо диэтэххэ, Сахабыт сирин сайына бэйэтэ да олус кэрэ. Быйылгы сайыммын эмиэ үлэ үөһүгэр атаарар былааннаахпын.

– Билигин эн интэриниэккэ “фэйсбук”, “инстаграм” курдук ситимнэргэ бааргын. Күннээҕи таһаарбыт хаартыскаларгын элбэх киһи көрөр, ааҕар, суруйар. Ол гынан баран ардыгар хобдох соҕустук суруйар дьон баар, киһи эрэ барыта эйигин сөбүлээбэт. Манныкка хайдах сыһыаннаһаҕын?

– Өскөтүн билбэт дьонум миэхэ араас куһаҕаны суруйар буоллахтарына, мин тута кинилэри сотторон кэбиһэбин. Ол аата мин страницабын аны кыайан көрбөттөр. Тоҕо кинилэр миэхэ киирэн араас куһаҕаны, хобу-сиби кэпсэтиэхтээхтэрий? Оннук сатаммат. Оттон үчүгэйи суруйар, кэпсэтэр, мин айар үлэбин сэргиир дьоҥҥо махтанабын эрэ буоллаҕа дии. Айар үлэбэр сүгүрүйээччи дьон бааллара миигин куруук кынаттыыр.

 

– Варя, түмүккэ, “Кэрэ ырыа” айар кэнсиэриҥ туһунан кылгастык билиһиннэриэҥ дуо? Кимнээх кыттыыны ылыахтарай? Көрөөччүлэри туох саҥа күүтэрий?

– Мин айар үлэм 1996 сылтан саҕаламмыта, онон былырыын, 2016 сылга 20 сылын туолбута. Ол гынан баран былырыын кэккэ биричиинэлэринэн кыайан оҥорботоҕум, онон быйылгы сылга көһөрбүтүм. Кулун тутар 31 күнүгэр Саха тыйаатырыгар “Кэрэ ырыа” диэн айар кэнсиэрбэр барыгытын ыҥырабын. Манна үксүн бэйэм ыллыыбын уонна Бүөккэ Бөтүрүөптүүн, Игорь Егоровтыын дуэттыам. Итиэннэ “Ый суола” диэн рок-бөлөҕү кытта хас да ырыаны толоруохпут. Манна урукку уонна билиҥҥи ырыаларбын ыллыам. Кэнсиэр дириэктэринэн дьүөгэм Люба Готовцева уонна режиссерунан Василий Борисов үлэлии сылдьаллар. Кэнсиэр күн хас биирдии кэлбит киһиэхэ “Звезды Туймаады” сурунаалы уонна диискэбин бэлэх уунуоҕум. Онон барыгытын ырыа алыптаах киэһэтигэр күүтэбин!

– Варя, интэриэһинэй кэпсэтииҥ иһин махтал. Айар үлэҕэр, сурунаалыҥ үлэтигэр ситиһии эрэ сиэттистин!

Натали Протопопова кэпсэттэ, edersaas.ru

Хаартыска: дьоруой тус архыыбыттан.

#бүгүн: 8
9
0

Сайт матырыйаалларын ааптар көҥүлэ суох ылар бобуллар.