Вашингтон бэрэпиэссэрэ сэминээр ыытта

Ааптар: 
Бөлөххө киир:

СӨ бастакы бэрэсидьиэнэ Михаил Ефимович Николаев олоххо киллэрбит “Муусука – барыбытыгар” бырайыак уһуйааннарга аналлаах салаатынан,  үс күннээх сэминээр саҕаланна.

edersaas.ru

Сэминээр дистанционнай үөрэтии быһыытынан барар. Тэрээһиҥҥэ “Муусука-барыбытыгар” бырайыагы көҕүлээччи, Михаил Ефимович аатыттан бэрэстэбиитэл Андрей Дедюкин, Хотугулуу-Илиҥҥи федеральнай университет, Дьокуускайдааҕы педагогическай кэллиэс бэрэстэбиитэллэрэ, Дьокуускай куорат уонна улуус уһуйааннарын муусукаҕа салайааччылара кытыннылар.

СӨ үөрэҕин уонна наукатын миниистирэ Владимир Егоров: “Бэҕэһээ, СӨ бастакы бэрэсидьиэнэ Михаил Николаев 80 сааһын туолла. Биһиги министиэристибэбит Михаил Ефимовиһы “Учууталлар учууталлара” бэлиэнэн наҕараадалыырга быһаарынна. Кини көмөтүнэн 2013 сыл алтынньы 1 күнүгэр – Муусука күнүгэр “Муусука барыбытыгар” бырайыак саҕаламмыта. Бу – өрөспүүбүлүкэҕэ үөрэх тэрилтэлэригэр оҕону муусукаҕа үөрэтии киэҥ далааһыннаах бырайыага. Саха сирин оҕотун барытын муусукаҕа үөрэтиигэ туһаайыллар.  Шейла Вудворд көмөтүнэн, өрөспүүбүлүкэҕэ “Муусука барыбытыгар – оҕо саадтарыгар” бырайыак саҕаламмыта. Былаан быһыытынан, уһуйаан  муусукаҕа 500 салайааччытын квалификациятын үрдэтэр, кырачааннары дорҕоон уонна муусука эйгэтигэр сыһыарарга Шейла Вудворд ньыматын киллэрэр уонна бары уһуйааннары муусука үстүрүмүөннэринэн хааччыйар былааннаахпыт”, – диэн эттэ.

Онтон Андрей Дедюкин: «Михаил Ефимович барыгытыгар көхтөөх, ситиһиилээх үлэни баҕарар. Санааларбыт, кэпсэтиилэрбит дьэ, олоххо киирэн эрэллэр. Музыковедтар, психологтар санааларын ыйыталаһан баран, оскуола иннинээҕи саастаах  оҕону муусукаҕа үөрэтии оонньуу быһыытынан барара ордук диэн түмүккэ кэлбиттэр. Кыра оҕо классическай муусуканы улаханнык истиэн баҕарбат, оонньуон баҕарар«, – диэн бэлиэтээтэ.

Бэрэпиэссэр, Вашингтоннааҕы Илиҥҥи университет муусукаҕа салаатын дириэктэрэ, муусука үөрэҕин норуоттар икки ардыларынааҕы Сэбиэтин чилиэнэ Шейла Вудворд, Бырабыыталыстыба 2-с нүөмэрдээх дьиэтигэр буолбут сэминээргэ, оскуола иннинээҕи кыра саастаах оҕолору күргүөмүнэн муусука үстүрүмүөннэригэр оонньооһун саҥа ньымаларыгар үөрэттэ. Уруок түмүгүнэн, мустубут дьон санааларын атастастылар. “Кырачааннар – дорҕоон дойдутугар” өрөспүүбүлүкэтээҕи куонкурус кыайыылаахтарын видео-үлэлэрин көрдүлэр. Сэминээргэ анаан хас даҕаны кэмпилиэк муусука үстүрүмүөнүн атыыласпыттар. Онон иитээччилэр аҥардастыы көрөн эрэ буолбакка, бэрэпиэссэрдиин тэҥҥэ тыаһаттылар, үөрэннилэр. Сэминээр үс күн устата барыаҕа.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0