Бэс ыйын 27 күнүгэр иккис нүөмэрдээх Бырабыыталыстыба дьиэтигэр Европа икки төгүллээх чөмпүйүөнүн, боксаҕа Арассыыйа спордун үтүөлээх маастарын Василий Егоровы чиэстээһин буолла. Василий бэс ыйын 16-24 күннэригэр Украина Харьков куоратыгар ыытыллыбыт боксаҕа Европа чөмпүйэнээтигэр 49 киилэҕэ Украина боксерун Назар Куротчины, Белоруссияттан Евгений Кормильчугу уонна финалга англичанин Галал Яфайы кыайан, чөмпүйүөн үрдүк аатын сүктэ. Уопсайа, кини ыйааһыныгар 15 дойдуттан боксердар кытыннылар. Василийы кытта Үрдүкү спортивнай маастарыстыба оскуолатын дириэктэрэ Александр Игнатьев сылдьыспыта.
Пресс-конференцияҕа Ил Дархан уонна бырабыыталыстыба дьаһалтатын салайааччыта Федор Борисов эҕэрдэлээтэ , «Гражданскай килбиэн» бэлиэни уонна 600 000 солкуобайы туттарда. Тренер Артур Пахомовка 300 000 солкуобайы чөмпүйүөнү бэлэмнээбитин иһин туттарылынна. Маны таһынан, Саха Өрөспүүбүлүкэтин Боксаҕа федерациятын бэрэссэдээтэлэ Петр Алексеев 600 000 солкуобайы Василийга уонна 300 000 солкуобайы тренер Иннокентий Пахомовка наҕараада туттарда. Бэйэтин эҕэрдэтин Саха Өрөспүүбүлүкэтин спорка миниистирэ Георгий Балакшин эттэ. Василий аны атырдьах ыйын 25 күнүгэр Германияҕа Гамбург куоракка ыытыллар аан дойду чөмпүйэнээтигэр кыттыыны ылар чиэскэ тигистэ.
—-«Билигин дойдубар, Мэҥэ Хаҥаласка тахсан сынньаныам. Онтон от ыйын 13 күнүттэн Кисловодскай куоракка сборга барыахтаахпын. Билигин туох баар күүспүн аан дойду чөмпүйэнээтигэр кыттарбар ууруом. Улахан махталбын Саха Өрөспүүбүлүкэтин бырабыыталыстыбатыгар, спорт министиэристибэтигэр, Үрдүкү спортивнай маастарыстыба оскуолатын салалтатыгар, чугас дьоммор уонна миэхэ ыалдьыбыт дьоҥҥо барыларыгар тиэрдэбин».
Николай Попов, «Саха сирэ» хаһыат, edersaas.ru