Саха сирин спортивнай тустууга федерациятыгар иһитиннэрбиттэринэн, Владимир куоракка буолбут мөлтөхтүк истэр спортсменнар ортолоругар көҥүл тустууга Арассыыйа чөмпүйэнээтигэр саха тустууктара биэс – биир кыһыл көмүс, биир үрүҥ көмүс, үс боруонса — мэтээли ылары ситистилэр.
2017 сыллааҕы Сурдлимпиада чөмпүйүөнэ Василий Стрекаловскай 70 киилэҕэ диэри ыйааһыҥҥа бастакы нүөмэр буоларын бигэргэттэ. Кини утуу-субуу Хасим Абдумасатовы (Дагестан) уонна Расул Танкиевы (Ингушетия) 10:0 ахсаанынан хотуталаата. Салгыы финал аҥарыгар Азамат Токмаковы (Кабардино-Балкария) ыраастык уурда. Түмүк хапсыһыыга утарылаһааччыта Зураб Цечоев (Ингушетия) доруобуйатын туругунан көбүөргэ тахсартан аккаастанна. Онон Василий Стрекаловскай дойду чөмпүйэнээтигэр иккис кыһыл көмүс мэтээлин ылыан ылла.
Атын ыйааһыннарга Валерий Чемпосов (65 кг) — үрүҥ көмүс, Егор Скрябин (57 кг), Сергей Николаев (57 кг) уонна Андриан Ильин (70 кг) боруонса мэтээллэри ыллылар.
Роман ПОПОВ, “Саха сирэ” хаһыат, edersaas.ru
+1
+1
+1
+1
+1
+1
+1