Турция Самсун куоратыгар ыытыллар Сурдлимпийскай оонньуулар кыһыл көмүс мэтээллэрэ саха бөҕөһүн түөһүгэр күлүмүрдүү оонньоото! Бөөлүүн буолбут 70 киилэҕэ диэри ыйааһыҥҥа түмүк хапсыһыыга Майаҕатта Бэрт Хара удьуора Иран тустуугуттан сыра сылба быстар киирсии тиһэх мүнүүтэтигэр кыайыыны ыһыгыннарда.
Арассыыйа чөмпүйүөнэ бастакы хапсыһыытыгар аан дойду үрүҥ көмүс призерун Христо Кличуровы (Болгария) 11:0 ахсаанынан илиилээх-атахтаах оҥорбото. Салгыы Украина тустуугун Виталий Корепановы 14:3 ахсаанынан баһыйа тутта.
Кыайыылааҕы быһаарар түмүк хапсыһыыга саха ньургунун утары Хосейн Дерикванд таҕыста. Иран бөҕөһө бу эрэ иннинэ икки утарылаһааччытын үрүҥ хараҕын өрө көрдөрбөккө, быһа кыайталаабыта.
Хосейн Дерикванд киирдэ киирээт икки очукуону сурунна. Салгыы Василий иранеһы утары албаска түбэһиннэрэн түөрт очукуоҕа быраҕан түһэрэр.
Иккис түһүмэххэ Дерикванд харса суох кимэн түөрт очукуону ылан, чорбойон тахсар. Хапсыһыы тиһэх мүнүүтэтигэр Василийбыт утарылаһааччытыттан икки очукуону ыһыгыннарда. Итинэн Уус Алдантан төрүттээх бөҕөс Сурдлимпиада кыайыылааҕынан буолла, бэйэтин аатын саха спордун устуоруйатыгар кыһыл көмүс буукубанан суруйда, үс саха үөрүүтүн үрдэттэ!
Роман ПОПОВ, «Саха сирэ» хаһыат, edersaas.ru