Виктор Ан Соҕуруу Кореяҕа ыытыллар Оонньууларга хайаатар да кыттар санаалаах
Олимпийскай оонньуулар алта төгүллээх чөмпүйүөннэрэ Виктор Ан Арассыыйа Федерацията спортсменнара 2018 сыллааҕы Олимпиадаҕа олимпийскай былааҕынан кыттыахтаахтарын туһунан МОК быһаарыытын кытта сөпсөһүөхтээх диэн эттэ. Виктор Ан бэйэтэ Соҕуруу Кореяҕа ыытыллар Оонньууларга хайаатар да кыттар санаалаах.
edersaas.ru
— Арассыыйа Олимпиаданы бойкуоттаабатаҕына, мин МОК былааҕынан да күрэстэһэргэ бэлэммин. Бу күрэхтэһиигэ түөрт сыл бэлэмнэнним, онон эрдэтинэ бэринэр санаам суох. Өскөтө, Арассыыйа Оонньуулары бойкуоттуур күннээх буоллаҕына, хайдах быһаарыныахпын билбэппин. Ол туһунан толкуйдуохпун даҕаны баҕарбаппын, — диэтэ кини.
— Арассыыйаҕа спортсменнар туһунан толкуйдуур буоллахтарына, нейтральнай былааҕынан күрэстэһэр кыаҕы биэриэхтээхтэр. Биир өттүнэн, МОК быһаарыытын Арассыыйа ыараханнык ылыммытын өйдүөххэ сөп.
Санатар буоллахха, ахсынньы 5 күнүгэр МОК бэйэтин быһаарыытынан Арассыыйа олимпийскай кэмитиэтин ууратта, онон дойду сүүмэрдэммит хамаандата Пхенчханнааҕы Олимпиадаҕа Арассыыйа былааҕынан, өрөгөй ырыатынан кыттар бырааба быһылынна. Арассыыйа спортсменнара олимпийскай былааҕынан уонна OAR диэн аббревиатуранан (Olympic Athlete from Russia — Арассыыйаттан сылдьар спортсмен) — күрэстэһэр кыахтаныахтара.
Роман Попов, «Саха сирэ» хаһыат, edersaas.ru