Виктор Федоров: “АЛРОСА-Ньурба”-ҕа блокируйдуур акциябыт суох

Бөлөххө киир:

Ил Түмэн экономикаҕа, инвестицияҕа, промышленнай бэлиитикэҕэ, предпринимательствоҕа, туризмҥа уонна инфраструктураны сайыннарыыга сис кэмитиэтин бэрэссэдээтэлэ Виктор Федоров этэринэн, “АЛРОСА” хампаанньа “АЛРОСА-Ньурба” 87,48 % акциятын илдьэ сылдьарынан, баһыйар куолаһы ылар.

Аграфена КУЗЬМИНА, «Саха сирэ» хаһыат, https://edersaas.ru/

Билигин “АЛРОСА-Ньурба” хампаанньа акционердарынан «АЛРОСА» АХ (87,48 %), Саха Өрөспүүбүлүкэтэ (10 %) уонна атын юридическэй уонна физическэй сирэйдэр (2,52 %) буолаллар. Дьокутаат Виктор Федоров этэринэн, “АЛРОСА-Ньурба” баһыйар үгүс акцията “улахан” “АЛРОСА”-ҕа баарынан, киниттэн улахан тутулуктаах.
— “Улахан” “АЛРОСА” акционер быһыытынан баһыйар үгүс куоластааҕынан туһанан, хаһан баҕарар куолаһын ылыннарар кыахтаах. Билигин аны президенэ уларыйан, сарсын туох диэн турара биллибэт. Ону ааһан, акциялар ырыынакка атыыланар сыаналара үрдээн турар. Онон билигин атыылыыр өрөспүүбүлүкэҕэ быдан барыстаах. Ылан көрүҥ, “АЛРОСА-Ньурба”-ны,  барытын “АЛРОСА” үбүлээн олорор, үлэһиттэр хамнастарыгар тиийэ. Бу 67 киһилээх хонтуора “АЛРОСА”-ҕа туора сылдьар тиксиһиннэрээччи курдук сылдьар. Оҥорон таһаарыыга кыттыспат. Онон баһыйар үгүс акциялаах дьон тугу баҕарар диэхтэрин сөп.
Виктор Николаевич бэлиэтииринэн, судаарыстыба сүрүн соруктарын толорууга илдьэ сылдьар эрэ баайын-дуолун хаалларыахтаах, онтон атынын чааһынайга ыытыахтаах.
— Холобур, алмаас кырыылааһынын ылан көрүөххэ. 1993 с. бу салааҕа күндү таастарынан дьарыктанар анал кэмитиэт (Комдрагмет) тэриллибитэ. Судаарыстыба 2000 сыллардаахха бу кэмитиэтинэн дьарыктанарын тохтотон, атын сыалы-соругу тутуспута. Билигин кэмитиэт судаарыстыбаннай сыалы-соругу тутуһар дуо? Ювелирнай бырамыысыланнаһы төһө өрө көтөҕөн таһаарда? Судургутук эттэххэ, тэрилтэ судаарыстыбаннай сыалы ситиһэргэ үлэтин туһулуохтаах эбэтэр судаарыстыба илдьэ сылдьар акцияларын атыыга таһааран бүддьүөккэ харчы киллэриэхтээх. Манна туох да уустук суох. Судаарыстыба тоҕо көмүһү хостооһунунан дьарыктаныахтааҕый? Судаарыстыба сыала-соруга  диэн социальнай хайысха, — диэн бэлиэтиир Виктор Николаевич.

Аграфена КУЗЬМИНА, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0