Сэтинньи 11-12 күннэригэр Москва куоракка ыытыллыбыт көҥүл тустууга «Европа нацияларын” ол эбэтэр АЛРОСА Кубогар, Арассыыйа хамаандата бастаата. Дойдубут хамаандата кыайыыга хардыылыырыгар улахан өҥөнү норуоттар икки ардыларынааҕы кылаастаах спорт маастара, Саха чулуу уола Виктор Рассадин оҥордо.
Норуоттар икки ардыларынааҕы турнир хамаандаларынан киирсэр быһыылаахтык барда. Хамаандалартан хас биирдии ыйааһыҥҥа бэрэстэбиитэллэр тахсан киирсэллэр. Кыайбыт бөҕөс хамаандатыгар очукуо аҕалар. Хайа хамаанда элбэх очукуолаах да ол кыайар. Арассыыйа хамаандатын кытта Молдавия, Грузия уонна Азербайджан хамаандалара кииристилэр. 65 киилэҕэ диэри ыйааһыҥҥа үс төгүллээх Коркин турнирын кыайыылааҕа, Арассыыйа чөмпүйэнээтин үрүҥ көмүс призера Виктор Рассадин уонна эдэрдэргэ Европа түһүлгэтин кыайыылааҕа Красноярскайтан Мурад Нукхадиев дьүөрэлэһэн кииристилэр.
Грузия хамаандатын кытта киирсиигэ тренердэр Викторы киллэрбиттэрэ. Кини утарсааччытын, Эдэми Болквадзены 10:0 ахсаанынан кыайан хамаандатыгар очукуо аҕалбыта. Молдовия хамаандатын кытта киирсиигэ Викторы Мурад Нухкадиев солбуйбута уонна утарсааччытын эмиэ сабырыйбыта.
Финалга Арассыыйа хамаандата Азербайджан хамаандатын кытта тахсыбыта. Эппиэтинэстээх киирсиигэ Арассыыйа хомуур хамаандатын тренерэ Джамболат Тедеев Викторы киллэрэр санааны ылынна. Кини утарсааччытынан байыаннайдарга аан дойду чөмпүйүөнэ Агагусейн Мустафаев буолла. Тыҥааһыннаах киирсии кэнниттэн Виктор утарсааччытын 7:2 ахсаанынан кыайан, Арассыыйа хамаандата чөмпүйүөн үрдүк аатын сүгэригэр бэйэтин улахан кылаатын киллэрдэ.
Виктор Рассадин, АЛРОСА кубогын кыайыылааҕа:
— Бу турнирга Азербайджан хамаандатын бөҕөһүн кытта киирсэр ыарахан этэ. Кини тустуута миэхэ олус табыгаһа суох курдук буолан биэрбитэ. Эбиитин бу ыйааһыҥҥа кини тустубута ыраатта, уопуттаах даҕаны. Кинини кыайбыппыттан уонна хамаандабар олус наадалаах очукуону аҕалбыппыттан астынабын.
Санатан ыллахха, Виктор Рассадин быйылгыттан 65 киилэҕэ туста сылдьар. Олимпиадаҕа баар ыйааһыҥҥа уолбут өссө элбэх ситиһиилэниэ диэн бигэ эрэллээхпит.
Финал түмүгэ
Арассыыйа- Азербайджан — 5:3
57 кг. Хасанхусейн Бадрудинов — Георгий Эдишерашвили 2:4
61 кг. Александр Богомоев — Али Рагимзаде — 10:2
65 кг. Виктор Рассадин — Агагусейн Мустафаев — 7:2
70 кг. Заурбек Сидаков — Муртазали Муслимов — 5:4
74 кг. Магомедхабиб Кадимагомедов — Исмаил Абдуллаев — 7:1
86 кг. Артур Найфонов — Александр Гостиев — 10:8
97 кг. Шамиль Мусаев — Шариф Шарифов — 1:6
125 кг. Заур Козонов — Джамаледдин Магомедов — 0:10
Николай ПОПОВ, «Саха сирэ» хаһыат, edersaas.ru