Витязевоттан сэттэ мэтээллээх

Ааптар: 
Бөлөххө киир:

Кикбокса тэрилтэлэрин аан дойдутааҕы ассоциацията (WAKO) тэрийэн ыытар “А” кылаастаах аан дойду Кубогын түөрт күрэхтэһиититтэн биирдэстэрэ бу ый саҥатыгар Витязево куоракка (Анапа) буолла. Бу тохсус сылын ыытыллыбыт турнирга Саха сирин кикбоксердара сэттэ мэтээли ылары ситистилэр.


Өрөспүүбүлүкэ сүүмэрдэммит хамаандатын сүрүн тириэньэрэ Андрей Алексеев иитиллээччитэ Михаил Иванов кикбоксинг биир уустук көрүҥэр – “лоу киктаах фул контакка”, бастакы миэстэни ылла. Ньурба ыччата 67 киилэлээхтэргэ Владимиртан, Сызраньтан кэлбит утарсааччыларын эрэллээхтик баһыйа тутаттаата. Түмүк киирсиигэ Камчатка кикбоксерун бастакы рауҥҥа дөйүтэн, быһа кыайыыны ситистэ.

Уһук Илиҥҥи уокурук хас да төгүллээх чөмпүйүөнэ Игорь Федоров (Дьокуускай) “К-1” түһүмэххэ (манна илиини, атаҕы сэргэ тобугунан охсуу көҥүллэнэр) бастаабыт Казахстан уолугар хотторон, үһүс миэстэҕэ таҕыста.

Бэтэрээннэр ортолоругар аан дойду чөмпүйэнээтин призера, норуоттар икки ардыларынааҕы кылаастаах спорт маастара Александр Григорьев уонна тайскай боксаҕа Арассыыйа икки төгүллээх чөмпүйүөнэ Алексей Иванов эмиэ ситиһиилээхтик күрэстэстилэр. Ол курдук, Бүлүү уопутаах кикбоксера Александр 74 киилэҕэ диэри ыйааһыҥҥа «лайт контакт» итиэннэ «кик лайт» көрүҥнэргэ иккис, үһүс буолла. Сунтаартан төрүттээх Алексей «лайт контакт», «пойнт файтинг» көрүҥнэргэ кыһыл көмүс, үрүҥ көмүс мэтээллэри ылаттаата.

52 киилэҕэ диэри ыйааһыҥҥа «фул контакка» «World cup Diamond» турнир былырыыҥҥы кыайыылааҕа, Усуйаана кэскиллээх спортсмена Арчылан Семенов иккис миэстэҕэ тахсан, бастатан туран, чугас дьонун, тириэньэрин Дмитрий Солдатовы үөртэ.

Роман ПОПОВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0