Алексей ВИНОКУРОВ, Нам улууһунааҕы Бизнес-инкубатор дириэктэрэ:
— Арассыыйа таһымыгар дьоҕус бизнескэ тустаах инвестициялыыр бырагыраама наада. Ол тосхолго олоҕуран, урбаанньыттарга икки сыл уһатыылаах 6-7 % иэс (займ) бэрилиннэр, бэрт дьоһуннаах өйөбүл буолуо этэ. Биһиэхэ, Саха сиригэр, министиэристибэбит бу боппуруоһу олоххо киллэрэргэ үлэлэһэн эрэр. Бырагыраама Арассыыйатааҕы таһымнаннаҕына, суолтата ордук үрдүөҕэ. Мин бу боппуруоска туох санаалааҕын РФ бэрэсидьиэнэ Владимир Путинтан ыйытыам этэ.
Евдокия ДЬЯЧКОВСКАЯ, СӨ Ыраах айан суоппардарын ассоциациятын салайааччыта:
— РФ Уһук Илини сайыннарыы уонна бырамыысыланнас уонна эргиэн министиэристибэлэрин нөҥүө Арассыыйа үрдүнэн пассажирдары уонна таһаҕаһы тиэйэр айан массыыналарын саҥардыыга үбүлээһин көрүллэр. Ирдэбил быһыытынан, массыына 5-6 сыл сүүрүөхтээх. Онон сотору кэминэн Дьокуускай к. пассажирдары тиэйэр оптуобустары саҥардыахтара. Таһаҕаһы тиэйэр массыыналарга эмиэ оннук саҥардыы ыытыллыахтаах да, сүрүннээн, суол оҥорор анал тиэхиньикэни эрэ уларыталлар. Оттон Хоту сир саамай тыйыс усулуобуйатыгар үлэлиир, норуот хаһаайыстыбатын табаарын, таһаҕаһын тиэйэр ыраах айан суоппардарын массыыналара болҕомтоҕо ылыллыбаттар. Онон бу боппуруоһу РФ бэрэсидьиэнигэр Владимир Путиҥҥа туруорсуом.
Петр ТАРАСОВ, “Чурапчы улууһа” МТ ыччат уонна дьиэ кэргэн бэлиитикэтин отделын исписэлииһэ:
— Саҥа үөрэхтэрин бүтэрбит ыччаттартан үлэ ыстааһын көрдүүр буолан, үгүс эдэр дьон талан ылбыт идэлэриттэн тэйэн эрэллэр. Ол да иһин билигин ыччаттар фрилансер — көҥүл сылдьан үлэлиир хайысханы тобуллулар. Онон сотору кэминэн оскуоланы бүтэрээт, салгыы үөрэммэккэ, идэ ыларга дьулуспакка, эдэр дьон көҥүл сылдьан үлэлиир буолуохтара. Мин РФ бэрэсидьиэнэ Владимир Путинтан саҥа үөрэҕи бүтэрбит ыччаттан үлэ ыстааһын ирдээбэттэрин курдук ыйаах таһаарыаххын сөп дуо диэн ыйытыам этэ.
Елена ПОТОЦКАЯ, edersaas.ru