Атырдьах ыйын 9-12 күннэригэр Бордо куоракка (Франция) буолбут пауэрлифтиҥҥа Европа чөмпүйэнээтигэр Саха сирин спортсмена Владимир Балынец өссө биир чаҕылхай ситиһиилэннэ.
Пауэрлифтиҥҥа норуоттар икки ардыларынааҕы федерация (IPF) былааҕынан ыытыллыбыт континент быйылгы күрэхтэһиитигэр 25 судаарыстыба 200 күүстээх атлета кытынна.
Арассыыйа үтүөлээх тириэньэрэ Петр Давыдов иитиллээччитэ Владимир Балынец 59 киилэҕэ диэри ыйааһыҥҥа бу да сырыыга кими да тутуһуннарбата. Ол курдук, үһүс холонуутугар 172,5 кг анньан, былырыын олохтообут Европа рекордун биир киилэнэн тупсарда. Иккис буолбут Дариуш Взола (Польша) көрдөрүүтэ — 147,5 кг. Фредрик Мирванг (Норвегия) 145 кг анньан үһүс миэстэҕэ таҕыста.
Санатан эттэххэ, Владимир Балынец бу көрүҥҥэ аан дойду рекордсменынан буолар. Ыам ыйыгар Хельсинки куоракка (Финляндия) ыытыллыбыт чөмпүйэнээккэ кини 175 кг анньан бастаабыта.
Роман ПОПОВ
Хаартыска интэриниэттэн ылылынна.
+1
+1
+1
+1
+1
+1
+1