Бүгүҥҥүттэн «Дьулуур: мас тардыһыыта» диэн киинэни устуу саҕаланна. «Лена» киинэ тыйаатырын кафетыгар киинэ продюсердара Иннокентий Луковцев, Оксана Лахно, Филипп Абрютин, Арассыыйа биллэр артыыһа Владимир Епифанцев, «Модун» СК дириэктэрэ Иван Борисов суруналыыстары кытары көрүстүлэр.
«Дьулуур» мас тардыһааччы уол туһунан киинэ сценарийа сахалыы киинэ бырайыактарын иккис питчинигэр бастыҥынан ааҕыллыбыта. Сотору буолаат, РФ Култуураҕа министиэристибэтэ ыыппыт ааптарыскай уонна экспериментальнай киинэлэр куонкурустарыгар 15 бастыҥ киинэлэр ахсааннарыгар киирэн, федеральнай үбүлээһиҥҥэ хапсыбыта. «Дьулуур: мас тардыһыыта» — Арассыыйа Култуураҕа министиэристибэтин өйөбүлүн ылбыт бастакы сахалыы киинэ буолар.
Киинэҕэ сүрүн оруоллары Владимир Михалев уонна Гаврил Менкяров оонньуохтара. Маны сэргэ, Арассыыйаҕа киэҥник биллэр артыыс Владимир Епифанцев («Антикиллер», «Лютый», «Спарта», «8 лучших свиданий», «Несокрушимый») бүгүн сарсыарда Дьокуускайга киинэҕэ уһуллаары көтөн кэллэ. Киинэни «Молодежные инициативы» продюсердар кииннэрэ уонна «AyarAat» айар бөлөх устуохтара.
Владимир Епифанцев, артыыс:
— «Дьулуур: мас тардыһыыта» киинэҕэ оонньуоххун сөп дуо диэн этии киллэрбиттэригэр тута сөбүлэспитим. Хас да артыыс бу оруолтан аккаастаммытын истибитим. Элбэхтик үлэлиирбин сөбүлүүр киһибин. Киинэҕэ мин дьоруойум ойбоҥҥо умсан ылыахтаах. Онтон да куттаммаппын. «Артыыс киһи барытын боруобалыыр. Онон ойбоҥҥо умсуохтаахпын диэн бэйэбин өй-санаа, эт-хаан тртүнэн бэлэмнииргэ кыһаллабын. Киинэҕэ мин сүрүн дьоруой аҕатын оонньуубун. Кини олоҕун ыарахан, быһаарыылаах түгэннэригэр аҕата эппит тылларын, сүбэлэрин саныыр.
Киинэттэн ситимнэнэн, Дьокуускайга аан бастакыбын кэллим. Итиэннэ бу ытык сиргэ үктэнээт, ис испиттэн улаханнык долгуйдум.
Филипп Абрютин, продюсер:
— «Дьулуур: мас тардыһыыта» — сэдэх бырайыак. Саха сиригэр киинэни устуу кэнники сылларга күүскэ сайынна. «Эһиги өрөспүүбүлүкэҕитигэр кинобум буола турар. Биһиги, Арассыыйа киинэ устааччыларын сойууһун чилиэттэрэ, саха киинэтэ Арассыыйа таһымыгар тахсарын олус күүтэр буоллубут. Тоҕо диэтэххэ, икки-үс сылынан саха киинэтэ Арассыыйатааҕы киинэ-индустриятын тосту уларытар кыахтаныа. Маныаха Саха сирин артыыстара, режиссердара, продюсердара саҥалыы толкуйдууллар диэн бэлиэтиэххэ наада.
Иннокентий Луковцев, продюсер, артыыс:
— Бүгүҥҥүттэн «Дьулуур: мас тардыһыыта» киинэ уһуллуута саҕаланна. Хамаанда олус күүстээх, уопуттаах артыыстартан турар. Киинэни үс түһүмэҕинэн устуохпут. Буолаары турар мас тардыһыыга аан дойду чөмпүйэнээтин кэмигэр, тохсунньуга уонна от ыйыгар устуохпут. 2020 сылга көрдөрүөхпүт. Бүгүн Владимир Епифанцев Москваттан анаан көтөн кэллэ. Кини сүрүн дьоруой аҕатын оонньуоҕа.
Николай ПОПОВ, «Саха сирэ» хаһыат, edersaas.ru