Аҕыйах хонуктааҕыта Арассыыйа бэрэсидьиэнэ Владимимр Путин Бурятияҕа сылдьан регион былаастарын уонна олохтоохторун кытта көрсөн тирээн турар кыһалҕаларын уонна экология боппуруостарын дьүүллэстэ.
Улан Удэҕа дойду баһылыга Иркутскай уобалас Черемхово куоратын мэрэ Вадим Семеновы кытта сирэй көрсөн кэпсэттэ. Онно Черемхово мэрэ Владимир Путины атырдьах ыйын 26 күнүгэр шахтердар куораттарын 100 сылын үөрүүлээхтик бэлиэтээһиҥҥэ ыалдьыттыы кэлэригэр ыҥырда.
Кэпсэтии футболга иэҕиллибитигэр, Владимир Путин Черемхово баһылыгыттан 2018 сылга ыытыллар футболга аан дойду чөмпүйэнээтигэр Арассыыйа хамаандата хайдах кыттыай диэн интэриэһиргээбитигэр, Вадим Семенов: “Кырдьыгынан эттэххэ, мөлтөһүөрдүк”, — диэн хоруйдаата. Ону Путин соһуйа иһиттэ, санааны түһэрбэт куолута диэтэ, уонна “Баҕар, кыайыахпыт суоҕа гынан баран, тоҕо мөлтөхтүк оонньуохпутуй?”, — диэн ыйытта. Онуоха Семенов дойду бэрэсидьиэнэ бэйэтинэн тириэньэр буоллаҕына эрэ, футболистар табыллан оонньуохтарын сөбүн эттэ. “Суох. Хас биирдиибит бэйэтин дьыалатынан дьарыктаныахтаах. Төһөтүн даҕаны иһин, уолаттарбыт кыһалла сатыахтара диэн эрэниэҕиҥ”, – диэтэ Владимир Путин.
“Сибирские новости” ИА суруйарынан, судаарыстыба баһылыгын кытта көрсүһүү кэнниттэн Вадим Семенов бэйэтин бүгүҥҥү күҥҥэ саамай дьоллоох киһинэн ааҕыммыт.
Роман ПОПОВ, “Саха сирэ” хаһыат, edersaas.ru