Бырабыыталыстыба бэрэссэдээтэлэ Владимир Солодов бэҕэһээ Владимир Путин ыам ыйынааҕы ыйааҕар эрэгийиэннэр национальнай бырайыактарын оҥорорго этиллибитин толорууга үлэлиир бырайыактыыр офис мунньаҕын салайан ыытта.
— Эрэгийиэн бырайыага, бастатан туран, биһиги ойуччу тутар соруктарбытыгар ананыахтаах. Онон докумуоҥҥа национальнай бырайыактарга ыйыллар чопчу соруктар киллэриллиэхтээхтэр, — диэтэ Владимир Солодов.
Эрэгийиэннээҕи бырайыактыыр офис өрөспүүбүлүкэҕэ киллэриллэр национальнай бырайыактар методическай уонна тэрээһин боппуруостарын ырытан оҥорбут. Хас биирдии хайысханан Бырабыыталыстыба бэрэссэдээтэлин солбуйааччылар уонна миниистирдэр таһымнарынан бырайыактыыр кэмитиэттэр салайааччылара быһаарыллыбыттар. Билигин национальнай дьаһаллары ырытан оҥоруу түмүктэнэн эрэр итиэннэ федеральнай бырайыактыыр офис сүбэтигэр сөп түбэһиннэрэн, ахсынньы 14 күнүгэр диэри Ил Дарханы кытары сөбүлэһиллиэхтээх.
Эрэгийиэннээҕи бырайыак уон үс сүрүн хайысхалаах: «Демография», «Доруобуйа харыстабыла», «Үөрэхтээһин», «Наука», «Олорор дьиэ уонна куорат эйгэтэ», «Норуоттар икки ардыларынааҕы кэпэрээссийэ уонна экспорт», «Экология», «Куттала суох уонна хаачыстыбалаах массыына суола», «Үлэ оҥорумтуота уонна дьарыктаах буолуу өйөбүлэ», «Цифровой экономика», «Култуура», «Дьоҕус уонна орто урбаан итиэннэ бэйэ дьыалатын көҕүлээһини өйөөһүн», «Модернизация кэлим былаанын уонна магистральнай инфраструктураны кэҥэтии». Хас биирдии хайысха бэйэтин иһинэн биэс-алта бырайыактаах.
Мунньаҕы түмүктүүрүгэр премьер бырайыактыыр кэмитиэттэр салайааччыларыгар эрэгийиэн национальнай бырайыага дойду салалтата туруорар соруктарын толорорго туһуланар кэлим дьаһаллары олоххо киллэрэрин эттэ. Национальнай бырайыактары олоххо киллэрии нэһилиэнньэ олоҕун хаачыстыбатын тупсарыыга тирэх буолуоҕун, бу бырайыактарга хайдах үлэлиирбититтэн эрэгийиэн стратегическай сайдыыта тутулуктанарын бэлиэтээтэ. Айсен Николаевка киллэрэргэ бары уон үс хайысханан эрэгийиэн уратыларын пааспарын бу күннэргэ оҥорорго сорудахтаата диэн Ил Дархан уонна Бырабыыталыстыба пресс-сулууспата иһитиннэрдэ.
Раиса Сибирякова, «Саха сирэ» хаһыат, edersaas.ru