Бырабыыталыстыба бэрэссэдээтэлин э.т. Владимир Солодов атырдьах ыйын 30-31 күннэригэр Усуйаана улууһугар энергетика, таһаҕаһы тиэрдии уонна туһалаах сир баайын хостооһун туһунан мунньахтары салайан ыытыаҕа.
edersaas.ru
Бүгүн Владимир Солодов Депутатскайдааҕы ТЭЦ-ы уунан хааччыйарга анаан Поисковай үрүйэҕэ 1985 с. тутуллубут ууну мунньар сири көрдө-иһиттэ. Тутуу эргэрэн, үйэтин моҥообут, онон Иргичээн күөлүттэн уу ылар 8,5 км усталаах саҥа ситими тутуу кэм ирдэбилэ буолбут.
Күнүстэн киэһэ Депутатскайга кыстыкка киириигэ, энергетикаҕа туһуламмыт мунньах буолла. Сүрүн иһитиннэриини ОДьКХ миниистирин солбуйааччы Николай Дураев оҥордо. Бөһүөлэккэ оттук сезона атырдьах ыйын 24 күнүттэн саҕаламмыт, Усуйаанатааҕы кырдьаҕастар уонна инбэлииттэр интэринээт-дьиэлэрин сылааһынан хаачыйар модульнай хочуол өссө эрдэ холбоммут. Оттук сезонугар бэлэмнэнэн, сайыҥҥы өрөмүөн кыраапык быһыытынан ыытыллыбыт, икки ууну сылытар хочуол уонна турба уларытыллыбыттар. Депутатскайдааҕы ТЭЦ кыстыкка бэлэм эбит: үс хочуол, итии-тымныы уу ситимнэрэ, 850 миэтэрэ усталаах сүрүн үөс ситимэ өрөмүөннэммиттэр, ДЭС-кэ 520 кВт кыамталаах икки дизель-генератор холбоммут. Туһанааччылар төлөһүүлэрэ бытаанын иһин, «Сахаэнерго» АУо салалтата эбийиэктэргэ сылааһы биэриини хааччахтыах буолар. Ол курдук, от ыйын 1 күнүнээҕи туругунан, Усуйаана улууһун Биир кэлим эксплуатационнай сулууспата энергетиктэргэ 57 мөл. солк., киин балыыһа 9,5 мөл солк иэстээх эбиттэр.
Сарсын премьер-миниистир э.т. Усть-Куйга бөһүөлэгэр уу суолунан оттук-энергетика ресурсаларын, социальнай суолталаах таһаҕаһы, аһы-үөлү тиэрдиигэ анаммыт мунньаҕы ыытыаҕа. Онтон Депутатскайга төннөн, көмүһү уонна хорҕолдьуну хостооһун боппуруостарын көрүөҕэ. Сүрүн иһитиннэриини бырамыысыланнас уонна геология миниистирин э.т. Максим Терещенко оҥоруоҕа.
Раиса Сибирякова, «Саха сирэ» edersaas.ru