Владимир Солодов: «Диспансеры болдьоҕор тутууттан салгыы үбүлээһин тутулуктаах»
Саха Өрөспүүбүлүкэтин бырабыыталыстыбатын бэрэссэдээтэлин эбээһинэһин толорооччу Владимир Солодов Дьокуускай куоракка эмтиир тэрилтэлэри кэрийэн көрдө.
edersaas.ru
Владимир Солодов, бастатан туран, искэни эмтиир өрөспүүбүлүкэтээҕи диспансер 1-кы уонна 2-с уочаратын былаһааккаларыгар, кардиодиспансер 2-с уочаратын тутууга сырытта. Ону сэргэ, 2018 с. үлэҕэ киирбит Перинатальнай киини уонна Дьокуускай куораттааҕы Медицина киинин 2 №-дээх амбулатория-стационар дьиэлэрин үлэлэрин билистэ.
Аныгы тиэхиньикэнэн толору сэбилэммит саҥа Перинатальнай кииҥҥэ 1350-ча оҕо күн сирин көрдө. Онтон Дьокуускайдааҕы Медицина киинигэр оҕолору сэргэ улахан дьону эмиэ көрөллөр. 70-тан үөһээ саастаах дьоҥҥо гериатрия учаастага үлэлиир.
«Дьокуускай куоракка радиология отделениелаах уонна хаһаайыстыбаннай блоктаах искэн саҥа диспансерын тутуу Саха сирин нэһилиэнньэтин олоҕун орто уһунун 2 төгүл уһатыаҕа», – диэн СӨ доруобуйа харыстабылын миниистирэ Михаил Охлопков эбийиэктэргэ сылдьыы кэмигэр эттэ.
Искэн диспансерын бастакы уочаратын болдьоҕор тутууттан салгыы үбүлээһин тутулуктаах. «Радиология отделениетын тутууну кыайбатахпытына, иккис уочараты үбүлээһин боппуруоһун ким да көрүө суоҕа», – диэтэ В.Солодов. Радиология 30 куойкалаах отделениета билигин өрөмүөннэнэ турар, 2018 сыл ахсынньытыгар үлэҕэ киллэриллиэхтээх, ону тэҥэ сытар балыыһа саҥа дьиэтин сыбаайата түһэрилиннэ.
Миниистирдэр кэбиниэттэрин баһылыга кардиология диспансерын иккис уочарата тутуллар сирин көрдө-иһиттэ. Кардиология 150 куойкалаах киинин тутууга 3,5 млрд курдук үп наада. Сотору тутааччылар бу эбийиэк чугаһынааҕы дьиэлэри көтүрүөхтэрэ.
Манна даҕатан эттэххэ, кардиология сулууспатын өҥөлөрүнэн туһанааччылар куорат араас муннугар турар үс балыыһаҕа сылдьаллара табыгаһа суох.
«Кардиология туспа комплексын тутуу медицинскэй өҥөлөр хаачыстыбаларын тупсарыаҕа уонна биһиги быраастарбыт кыахтарын барытын туһаныахпыт. Өрөспүүбүлүкэҕэ материальнай-техническэй база үчүгэй, кылаабынайа, быраастар сүҥкэннээхэй эпэрээссийэлэри оҥороллор», – диэн Владимир Солодов саха хирурдара соторутааҕыта сүрэҕи көһөрүү эпэрээссийэтин ситиһиилээхтик оҥорбуттарын бэлиэтээтэ.
Биһ. корр., «Саха сирэ» хаһыат, edersaas.ru