Нэһилиэнньэ дьарыктаах буолуутугар көмөлөһөр сыл түмүктэрин таһаарыы чэрчитинэн Владимир Солодов салайааччылаах бырабыыталыстыба хамыыһыйата Дьокуускай куорат Нэһилиэнньэ дьарыктаах буолуутун киинигэр сырытта. Өрөспүүбүлүкэ премьер-миниистирэ ханнык түгэннэргэ болҕомтону ууруохха наадатыгар болҕомтону туһаайда.
Көһө сылдьар мунньахха дьарыктаах буолуу сулууспатын сүрүн боппуруостара уонна хайысхалара чопчуланнылар. Быһаарыллыахтаах соруктары дьүүллэстилэр. Владимир Солодов бэлиэтээбитинэн, бу, бастатан туран, дойдуга ыгым демографическай балаһыанньаны кытта сибээстээх: нэһилиэнньэ ахсаана, төрөөһүн аччыыр, үлэлиир кыахтаах дьон ахсаана эмиэ биэнсийэ тиһигэр уларытыылары киллэрии балаһыанньатыгар дьайдылар.
“Бу барыта дьарыктаах буолуу сулууспаларын биһиги хоруйдуохтаах ыҥырыыларбытыгар туһаайар. Бастатан туран, бу эйгэҕэ федеральнай бырабыыталыстыба уонна өрөспүүбүлүкэ баһылыга туруорар соруктарын толоруохтаахпыт. Бу кэлэр сылга тумус тутуллар соругунан буолуохтаах”, — диэтэ СИА-ҕа Владимир Солодов.
Маны сэргэ, дьарыктаах буолуу сулууспатын виртуальнай сервискэ көһөрүүгэ сорук туруорда. Сүбэ мунньахха этиллибитин курдук, киин өҥөтө кэлэр өттүгэр электроннай көрүҥүнэн оҥоһуллуон сөп, ити көдьүүстээх, табыгастаах уонна үрдүк хаачыстыбалаах буолуоҕа.
Сүрүн болҕомто миграцияҕа ууруллуоҕа. 2018 сылга 45 тыһыынча киһи көһөн барбыт. Бырабыыталыстьыба бэрэссэдээтэлэ Дьарыктаах буолуу кэмитиэтигэр дьон тоҕо көһөн барыытын биричиинэтин үөрэтэллэригэр сорудахтаата. «Уһук Илин атын регионнарыгар тэҥнээтэххэ, биһиэхэ балаһыанньа ама. Ол эрээри, кыра да буоллар, нэһилиэнньэ көһөн барыытын көрөбүт. Ким өрөспүүбүлүкэттэн барарын, тоҕо көһөрүн билиэхтээхпит, дьон өрөспүүбүлүкэҕэ хааларын ситиһэр туһугар. Кинилэр төннөн кэлэн баран үлэлээх буолалларыгар уонна өрөспүүбүлүкэбит экэниэмикэтэ сайдарыгар үлэлииллэрин туһугар сөптөөхтүк дьаһаныахтаахпыт«.
Ольга Старостина,
Анатолий Шестаков хаартыскаҕа түһэриитэ.