«Саха сирин киэн туттуута» норуот бириэмийэтин «Баҕа өттүнэн көмөлөһөөччү» («Доброволец») номинация биэс финалиһыттан кыайыылааҕынан Нам улууһун Аппааны нэһилиэгин олохтооҕо Владислав Соловьев таҕыста.
edersaas.ru
Куолаһы уопсай ааҕыынан түмүк маннык буолла:
— Владислав Соловьев, Нам улууһа, 10729 куоластаах, онтон 2263 — социальнай ситимнэргэ;
— Афанасий Алексеев, «Японец» автокиин салайааччыта, Дьокуускай к., 2698 куоластаах, онтон 777 — социальнай ситимнэргэ;
— Пётр Черкашин, Уус Алдан улууһа, 3895 куоластаах, 806 — социальнай ситимнэргэ;
— Наталья Миронова, Дьокуускай к., 8293 куоластаах, 565 — социальнай ситимнэргэ.
— Гликория Оконешникова, устудьуоннар профсойуустарын доброволецтарын киинин салайааччыта – 9811 куоластаах, онтон 2325 – социальнай ситимнэргэ.
«Саха сирин киэн туттуута» норуот бириэмийэтин «Баҕа өттүнэн көмөлөһөөччү» («Доброволец») бочуоттаах аат иһин күөн көрсүүгэ ханнык да номинациятааҕар тыҥааһыннаах киирсии буолла. Батсаап ситимигэр: «Уолбут кыранан хотторон эрэр. Кытаатыҥ, куоласпытын харыстаамыаҕыҥ!» — диэн ыҥырыы бөлөх аайы тарҕаммыта. Ол түмүгэр 918 куолаһынан Нам улууһун Аппаанытын олохтооҕо Владислав Соловьев кыайыылааҕынан таҕыста.
Суолталаах «Саха сирин киэн туттуута» норуот бириэмийэтин кыайыылааҕын аатын ылар иһин күөн күрэскэ кыттарга «Сахамедиа» холдинг ыытар куонкуруһугар сайаапканы Владислав кэргэнэ биэрбит.
— «Саха сирин киэн туттуута» норуот бириэмийэтин «Баҕа өттүнэн көмөлөһөөччү» («Доброволец») номинацияҕа миигин өйөөбүт өрөспүүбүлүкэ олохтоохторугар барҕа махталбын тиэрдэбин. Урбаанньыт буоламмын, дьону үлэлээх оҥорон, хамнастаналларыгар кыах биэрэбин. Ол эмиэ баҕа өттүнэн үтүө санаа дьулуура дии саныыбын. Бэйэм үлэм быыһыгар ХИФУ-га автодорожнай факультекка үөрэнэбин, — диэн санаатын үллэстэр эдэр киһи.
Саха сирин олохтоохторо сомоҕолостохторуна үгүһү ситиһиллэрин өссө биир туоһутунан Владислав Соловьев эрэллээх кыайыыта буолла.
Елена ПОТОЦКАЯ, «Саха сирэ» хаһыат, edersaas.ru