Батсаап ситимигэр кыыс оҕо сүттэ диэн сурук тарҕаммыт. «Водоканал» АУо үлэһитэ Иннокентий Колесов үлэ чааһын кэнниттэн дьиэтигэр бараары 16 нүөмэрдээх оптуобуска олорбут. Онно киирэн батсаапка оҕо сүттэ диэн сурук кэлбитин аахпыт. Арай көрбүтэ, сүппүт кыыска майгынныыр оҕо опуобуска утуйа олорор эбит. Таҥаһа-саба үүт-үкчү. Иннокентий кондукторга чугаһаан суругу көрдөрбүт. Кыыһы уһугуннаран баран туоһуласпыттар. Чахчы сүппүт кыыс буолан биэрбит. Ыйыллыбыт төлөпүөн нүөмэригэр эрийэн кыыс дьонугар биллэрбит. «Киин» киинэ тыйаатырыгар көрсөн, кыыһы аймахтарыгар туттарбыт.
«Иннокентийга улахан махталбытын тириэрдэбит. Үөрүүбүтүттэн уонна долгуйуубутуттан кыайан махтаммакка хааллыбыт. Киһи болҕомтолоох буолара олус туһалаах. Иннокентийга үтүө дьыалата үтүөнэн төнүннүн!» — диэн кыыс тетята Алия Кычкина махтанар.
Иннокентий Колесовы үлэтигэр грамотанан наҕараадалаабыттар уонна үлэтигэр эрэ буолбакка тус олоҕор болҕомтотун иһин махтаммыттар.
Николай Попов, «Саха сирэ» хаһыат, edersaas.ru