Атырдьах ыйын 18 күнүгэр «Дьиэ кэргэн – биһиги сылаас дьиэбит» өрөспүүбүлүкэтээҕи форум арылынна. Номнуо бэһис сылын ыытыллар форуму СӨ Үөрэхтээһиҥҥэ уонна наукаҕа, Үлэҕэ уонна социальнай сайдыыга министиэристибэлэр тэрийэллэр.
Надежда ЕГОРОВА,«Саха сирэ» хаһыат, edersaas.ru
Форум чэрчитинэн тулаайах уонна төрөппүт көрүүтэ-истиитэ суох хаалбыт оҕолору дьиэ кэргэҥҥэ иитэ ылбыт ыалларга «Эппиэтинэстээх төрөппүт—2017» өрөспүүбүлүкэтээҕи куонкурус буолла. Куонкуруһу СӨ Ыччат дьыалатыгар уонна дьиэ кэргэн бэлиитикэтигэр министиэристибэтэ оҕолору иитэ ылар дьиэ кэргэттэр Саха сиринээҕи ассоциацияларын кытары ыытта.
Куонкуруска өрөспүүбүлүкэ улуустарыттан:
Амматтан Маргарита уонна Николай Уваровтар,
Өлүөхүмэттэн Аграфена Джуалова,
Алдантан Наталья Ворошнина,
Уус Маайаттан Екатерина уонна Михаил Трофимовтар,
Горнайтан Тамара уонна Николай Петровтар,
Мэҥэ Хаҥаластан Ольга уонна Сергей Штеблау,
Дьокуускай куораттан Людмила Васильева дьиэ кэргэттэрэ кытыннылар.
Куонкурус түмүгүнэн бастакы миэстэни – 9 оҕону иитэр Наталья Ворошнина, иккиһи – 7 оҕону иитэр Людмила Васильва, үсүһү 23 оҕону иитэр Аграфена Джуалова дьиэ кэргэттэрэ ыллылар.
Кыайыылаах дьиэ кэргэн Ворошниннар ахсынньыга ыытыллар «Дьиэ кэргэн—2017» өрөспүүбүлүкэтээҕи бэстибээлгэ кыттар быраабы ыллылар. Үгэс курдук, бэстибээлгэ Саха сирин Ил Дарханын бириэмийэтэ туттарыллар. СӨ Үлэҕэ уонна социальнай сайдыыга министиэристибэтэ Ворошниннарга оҕону иитэр ыал Бүтүн Арассыыйатааҕы форумнарыгар (Москва куоракка) кытта баралларыгар айан ороскуотун төлүүр сертификаты туттарда.
Куонкурус кыайыылаахтарыгар уонна кыттааччыларыгар СӨ Үөрэхтээһиҥҥэ, Үлэҕэ министиэристибэлэрэ сыаналаах бириистэри туттардылар.
Надежда ЕГОРОВА,«Саха сирэ» хаһыат, edersaas.ru