Ааспыт өрөбүлгэ, балаҕан ыйын 24-гэр, Саха сирин үрдүнэн Сүүрүү уонна хаамыы күнэ буолла. Өрөспүүбүлүкэ киин куоратыгар Дьокуускай 385 сылыгар анаммыт тэрээһиҥҥэ уонунан тыһыынча чөл олоҕу өрө тутар эдэр-эмэн дьон кытынна.
Тэрийээччилэр иһитиннэрэллэринэн, дойду үрдүнэн 2004 сыллаахтан тэриллэр спорт бырааһынньыгар кыттааччы ахсаана сыллата эбиллэр. Ол курдук, 2014 сыллаахха “Кросс наций” Бүттүүн Арассыыйатааҕы сүүрүү күнүн чэрчитинэн ыытыллыбыт тэрээһиҥҥэ өрөспүүбүлүкэ үрдүнэн 263 тыһыынча киһи сүүрбүт, хаампыт буоллаҕына, былырыыҥҥы Сүүрүү, хаамыы күнүн кыттааччытын ахсаана 312 тыһыынчаҕа тиийбит. Бу сыыппара Саха сиригэр маассабай спорду сайыннарыыга, чөл олоҕу туругурдууга ахсаабат болҕомто уурулларын, онтон сиэттэрэн физическай култууранан тиһиктээхтик дьарыктанар дьон элбээн иһэрин туоһулуур.
Тэрээһин кэмигэр Дьокуускай уон биэс олохтооҕор ГТО Бүттүүн Арассыыйатааҕы физкултуура, спорт комплексын кыһыл көмүс бэлиэлэрэ үөрүүлээх быһыыга-майгыга туттарылыннылар.
Роман Попов, “Саха сирэ” хаһыат
Ааптар хаартыскаҕа түһэриитэ.