Хаҥалас отчуттара ходуһаҕа хоннохтоохтук киирдилэр

Бөлөххө киир:

Саха сирин ходуһаларыгар, от ыйын 9 күнүнээҕи туругунан, 4281 гектар иэннээх сир охсулунна, 1210,9 туонна от кэбиһилиннэ. Улуустарынан ылан көрдөххө, хаҥаластар 1370, мэҥэ хаҥаластар 480, чурапчылар 451, үөһээ бүлүүлэр 322, аммалар 313 гектардыы охсуулаахтар. Атыттар киэннэрэ 100 иһинэн-таһынан сылдьар. Кэбиһиигэ эмиэ Хаҥалас отчуттара инники иһэллэр: 325 туоннанын чөкөппүттэр. Былырыын сайын Манчаары оонньууларын тэрийэн ыыппыт Үөһээ Бүлүү улууһа от ыйын 17 күнүгэр 58 эрэ туонна оттоммут эбит буоллаҕына, быйыл от ыйын 9-гар 251 туонна кэбиһиилээх. Курааҥҥа хаптаран куурбут-хаппыт намнар 199 гектар охсуулаахтар, 20 туонна кэбиһиилээхтэр.

Хаҥалас улууһугар Улахан Аан аннынааҕы арыыларга от өлгөмнүк үүннэ.

Инньэ гынан өрөспүүбүлүкэ биир бөдөҥ фермерэ Михаил Павлов оту баһан эрэр.

Оттон Нам улууһугар сир-дойду курааннаабытын управление салайааччыта Прокопий Окоемов бигэргэтэр.

Бэл, өрүс арыытыгар халаан уута ылбатах ходуһалара курааннаан, хайыта барбыттар.

Улахан хаартыскаҕа: Хаҥалас бааһынайа Михаил Павлов (уҥаттан иккис) өлгөм үүнүүлээх ходуһатыгар.

Василий НИКИФОРОВ, “Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0