XXI үйэ чулуу бөҕөһүгэр Туймаадаҕа өйдөбүнньүк туруордулар (ФОТОГАЛЕРЕЯ)

Лоп курдук түөрт уон биэс сыл анараа өттүгэр, 1972 сыл атырдьах ыйын 31 күнүгэр, Мюнхеҥҥа ыытыллыбыт Олимпийскай оонньууларга саха бөҕөһө Роман Дмитриев көҥүл тустууга чөмпүйүөн үрдүк аатын ылбыта, төрөөбүт Сахатын сирин аан дойдуга дорҕоонноохтук ааттаппыта.

1976 сыллаахха Монреаллааҕы Олимпийскай оонньууларга үс саха тустууга — Павел Пинигин кыһыл көмүс, Роман Дмитриев үрүҥ көмүс, Александр Иванов боруонса мэтээллэри ылан, Олимп үрдэлин дабайан, үс саха үөрүүтүн үрдэппитэ.

Бүгүн, ити кэрэ-бэлиэ күҥҥэ сөп түбэһиннэрэн, күөх Туймаада килбэйэр киинигэр, Н.Тарскай аатынан өрөспүүбүлүкэтээҕи стадион таһыгар ССРС үтүөлээх маастара, ССРС, РСФСР үтүөлээх тириэньэрэ, аан дойду, Европа чөмпүйүөнэ, ССРС чөмпүйэнээтин алта төгүллээх кыайыылааҕа, Саха АССР физическай култууратын үтүөлээх үлэһитэ, Дьокуускай куорат, Эдьигээн, Бүлүү, Чурапчы улуустарын бочуоттаах гражданиннара Роман Михайлович Дмитриевкэ өйдөбүнньүк туруорулунна.

Роман Попов, «Саха сирэ» хаһыат