Дьокуускай куоракка, Орджоникидзе болуоссатыгар бүгүн сарсыардаттан киэһэ хойукка диэри бэрт үчүгэй тэрээһин ыытылынна. edersaas.ru
Саха Өрөспүүбүлүкэтин инвестиционнай сайдыыга уонна урбааҥҥа министиэристибэтэ итиэннэ биирдэм урбаанньыттары өйүүр Киин олохтоох бородууксуйаны оҥорон таһаарааччылары өйүүр, батарыы ырыынагын кэҥэтэр сыалтан «Саха сиригэр оҥоһулунна. Бэйэ киэнин атыылас!» промо-аахсыйаны тэрийдилэр.
Бу аахсыйа «Ыhыаҕым саргылаах таҥаhа, кэскиллээх киэргэлэ» диэн саха национальнай таҥаһын-сабын уонна симэҕин X өрөспүүбүлүкэтээҕи быыстапка-дьаарбаҥкатын чэрчитинэн үс күн устата, бэс ыйын 9-11 күннэригэр, тэриллиэҕэ.
Быыстапка-дьаарбаҥкаҕа Дьокуускайга олорор-үлэлиир биирдэм урбаанньыттары таһынан, Мэҥэ Хаҥалас, Амма, Хаҥалас, Уус Алдан улуустарыттан норуот маастардара, уран тарбахтаах иистэнньэҥнэр, уустар бэйэлэрин оҥоһуктарын – ыһыахха кэтиллэр таҥаһы-сабы уонна симэҕи, саха быһахтарын, сувенирдары, харысхаллары уо.д.а. – аҕаллылар.
Куорат мааны хотуттара ыһыахха кэтэр сиэдэрэй тигиилээх сахалыы ырбаахылары, хаһыаччыктары атыылаһан үөрдүлэр, кимнээх эрэ кыл сэлээппэни ыллылар, эр дьон өттө удьурҕай уктаах саха быһахтарын сэҥээрдилэр. Тирииттэн тигиллибит суумкалар, хаппардар, ойуулаах чааскылар, ыйдарынан харысхал бэлиэлэрэ үгүс дьон болҕомтотун тартылар.
Быыстапка-дьаарбаҥка маҥнайгы күнэ ааста. Сарсын, өйүүн өссө элбэх маастардар, урбаанньыттар кэлиэхтэрэ, таҥас да, симэх да эгэлгэтин аҕалыахтара. Киин куорат олохтоохторо уонна ыалдьыттара, өрөбүллэргэ Орджоникидзе болуоссатын тумна хаамымаҥ, Улуу тунах ыһыахтарга кэтэр таҥаскытын-сапкытын эрдэттэн хааччыныҥ!
Раиса Сибирякова, Саха сирэ хаһыат. Edersaas ru.
Хаартыскаҕа Евдокия Ефимова түһэриилэрэ.
