Туймаада ыһыаҕар Саха сирин уустарын «Уус түһүлгэтэ» бырагыраамаларынан — «Бастыҥ батыйа», «Сытыы быһах» уонна «Тыаһыыр хомус» диэн күрэстэр ыытыллаллара былааннанар. Бу туһунан Дьокуускай куорат дьаһалтатын уопсастыбаннаһы, иһитинэрэр-биллэрэр маассабай сириэстибэлэри кытары үлэҕэ департаменыттан иһитиннэрэллэр.
Куонкуруһу норуот маастара, хомуһу охсууга норуоттар икки ардыларынааҕы кылаастаах маастар Роман Готовцев – Мындыр Уус салайан, иилээн-саҕалаан ыытыа.
—Күөн күрэс маастарыстыбаны үрдэтэр сыаллаах-соруктаах тэриллэр. Билиҥҥитэ хас биирдии күрэскэ уоннуу киһи кыттара биллэр. Манна эдэр ыччат сайдарга дьулуура ордук үөрдэр, — диир Роман Ильич.
Бастакы куонкуруска уустар дьиэҕэ бэриллибит сорудаҕынан батыйа оҥорон аҕалыахтаахтар. Итиэннэ маһы кыһан төһө сытыытын, бөҕөтүн дьоҥҥо-сэргэҕэ көрдөрүөхтээхтэр. Онтон саха быһаҕын угун тута миэстэтигэр оҥоруохтаахтар уонна биитин олордуохтаахтар.
Хомуска сорудах уратылаах. Күн иннинэ бэриллибит соҕотуопкаларынан хомуһу бэлэмнээн аҕалыахтаахтар. Хомус дорҕоонугар болҕомто ууруллар.
Бэс ыйын 15 күнүгэр, Үс Хатыҥҥа, «Дыгын оонньууларыгар» анаан бириискэ саха быһаҕын уһаарыы сиэрэ-туома көрдөрүллүөхтээх. Онно чочуллубут үс быһах күрэс кыайыылаахтарыгар туттарыллыахтаах.