“Сааскы биир күн дьылы аһатар” диэн мээнэҕэ этиллибэт, дьыл баччатыгар хас биирдии күн күндү. Ыһыы үлэтин тэрийиигэ билиҥҥитэ харгыс суох: улуустар эрдэттэн оҥостон, былаан быһыытынан үлэлии-хамсыы сылдьаллар.
Раиса Сибирякова, “Саха сирэ” хаһыат, edersaas ru
Хааччыйыыга эппиэттээх оператордар тиийбэт сиэмэни уонна минеральнай уоҕурдууну кэмигэр аҕаланнар, тустаахтарга тиксэрбиттэр, кырыымчык үптээхтэргэ иэс биэрбиттэр. Онон ыһыыга наада буолар бурдук, хортуоппуй уонна оҕуруот аһын сиэмэтэ баар.
Хаһаайыстыбалар билигин, сүрүннээн, бааһына сиигин саптара сылдьаллар. Сорохтор ити үлэни бүтэрэн, ыһыыга киирдилэр. Ол курдук, аммалар уонна өлүөхүмэлэр бурдук ыһыытын саҕалаатылар, Мэҥэ Хаҥалас хаһаайыстыбалара номнуо 127 гектарга бурдугу, 20 гектарга сүөһү сиир култууратын ыстылар.
Ити курдук, үлэ тэрээһинигэр улахан харгыс суох. Арай, аҕыйах улууска көрүллүбүт субсидияны түһэрэргэ хаһаайыстыбалар сирэй счеттарынан арыйыыга кыратык бытаарыы тахсыбыт. Бу туһунан бүгүн Тыа хаһаайыстыбатын уонна ас-үөл бэлиитикэтин министиэристибэтигэр ыытыллыбыт сэлиэктэринэн мунньахха этилиннэ. Вице-премьер-миниистир Петр Алексеев ыһыыны хаачыстыбалаахтык ыытарга итиэннэ счеттары арыйыы боппуруоһун быһаара охсон, хаһаайыстыбаларга көрүллүбүт үбү ыытарга сорудахтаата.
Раиса Сибирякова, “Саха сирэ” хаһыат, edersaas ru