Өрөспүүбүлүкэ үрдүнэн бурдук 11 тыһ. 599 гектар бааһынаҕа ыһыллан, былаан 103,2 % толорулунна. Бу иһигэр сэлиэһинэй 2 тыһ. 56, эбиэс 6 тыһ. 240, оруос 10 гектарга ыһылынна.
Саамай улахан былааннаах Амма улууһа 4 тыһ. 140 гектары ыһан, сорудаҕын 101 % толордо. Эбиэһи 2 тыһ. 384, ньэчимиэни 1 тыһ. 264, сэлиэһинэйи 492 гектарга ыста. Хаҥалас улууһа ньэчимиэни 894, эбиэһи 610, сэлиэһинэйи 385 гектарга, Мэҥэ Хаҥалас оруоһу 1 тыһ. 91, ньэчимиэни 399, сэлиэһинэйи 166 гектарга ыһан, былааннарын лаппа куоһардылар. 477 гектарга үлэлээбит Чурапчы улууһа сорудаҕын 131,4 % толордо. Сунтаар, Нам, Таатта, Уус Алдан улуустара былааннарын толордулар. Онон бурдук ыһыыта тэрээһиннээхтик ыытылынна, кэмигэр түмүктэннэ. Билигин элбэх сыллаах от ыһыллар.
Тыа хаһайыстыбатын уонна ас-үөл бэлиитикэтин министиэристибэтин Сиртэн үүнээйини ылыыга департаменын исписэлиистэрэ ыһыы кэмигэр улуустарга тахсаннар, үлэни-хамнаһы миэстэҕэ хонтуруоллаатылар, үөскүүр кыһалҕалары тута быһаардылар. Холобур, Хаҥалас бөдөҥ хаһаайыстыбата биир тыраахтара алдьанан, атына өрөмүөнтэн кэлэ илик буолан, тиэхиньикэтэ суох ыксаабытыгар, департамент көмөтүнэн «Сайсары» ААУо аны күһүҥҥү үүнүү суотугар МТЗ 2022 тыраахтары биэрдэ. Ол түмүгэр, хаһаайыстыба сииги куоттарбата.
Раиса СИБИРЯКОВА, «Саха сирэ» хаһыат, edersaas.ru