“Я-ИНЖЕНЕР” куонкуруска 74 үлэ киирбит

Ааптар: 
Бөлөххө киир:

Үһүс төгүлүн ыытыллар “Я-ИНЖЕНЕР” диэн Уһук Илин уокурук куонкурус бастакы түһүмэҕэ быһаарылынна. Куонкуруска уопсайа 74 бырайыак киирбит.

edersaas.ru

Итинтэн 24 — устудьуоннар, 30— эдэр инженердэр, уоннааҕыта оскуола үөрэнээччилэрин үлэлэрэ.

Хамыыһыйаҕа инженер эйгэтигэр сыһыаннаах – Инженердэр үрдүкү сэбиэттэрин, “Я — инженер” бөлөх чилиэннэрэ итиэннэ СӨ Үөрэҕин уонна наукатын министиэристибэтин бэрэстэбиитэллэрэ кытыннылар. Кинилэр “Профессиональнай инженер” уонна “Эдэр инженер” категорияларынан бырайыактары ырытыстылар. Онтон оскуола үөрэнээччилэрэ ыыппыт үлэлэрин барыларын аһардылар. Оҕолор СӨ Үөрэҕин уонна наукатын министиэристибэтин нөҥүө “Бэс Чагда” оҕо сынньалаҥын уонна доруобуйатын бөҕөргөтөр кииҥҥэ анал симиэнэҕэ кэлэн дьарыктаныахтара диэн иһитиннэрдилэр.

Куонкуруска киирбит үлэни хас биирдиитин сыныйан көрдүлэр. Саҥа, сонун бырайыактары биһирии ырытыстылар, сорохтору эрэкэмэндээссийэлээх аһардылар, атыттары туора соттулар.

Владимир Аммосов, СӨ “Я-ИНЖЕНЕР” тэхэньиическэй исписэлиистэр координационнай кииннэрин бэрэссэдээтэлэ, куонкуруһу тэрийээччи:

— Биэс сыл тухары кэтээн көрдөхпүтүнэ, сыыйа цифровизацияҕа көһөн иһэрбит бэлиэтэнэр. Быйыл элбэх үлэ промышленнай тиэмэҕэ (гаас, нефть) киирдэ. Ону тэҥэ дьон кыһалҕатын быһаарыыга саҥаны киллэриигэ үлэлэр бааллар. Холобура, кыһын тымныыга массыынаны сылаас тутуу.    

Урукку сылларга кэпсэммит үлэлэр сыыйылыннылар, ол эбэтэр бэйэлэрэ саҥа сүүрээни киллэрэллэрин биһириибит. Кыттааччылар бэйэлэрин илиилэринэн оҥорбут эбэтэр үлэлэригэр көрсөр кыһалҕаларын быһаарбыт бырайыактарын таллыбыт”, — диэн бэлиэтээтэ.

Куонкурус сүрүн сыалынан оскуола үөрэнээччилэрин, эдэр исписэлиистэри инжнернэй, тэхэньиическэй идэлэргэ көҕүлээһин буолар. Тэрийээччилэр бэлиэтииллэринэн, куонкуруска  кыттааччы ахсаана эбиллэн, хабар ыыра кэҥээн иһэр. Ол курдук, быйыл үлэлэр Тюменьтан, Сургуттан тиийэ кэлбиттэр.

Санатан эттэххэ, иккис түһүмэххэ ааспыт кэскилээх, эдэр инженердэр “Синергия Севера” ыччат форумугар кэлэн үлэлэрин көмүскүөхтэрэ. Ону мүччү көппүттэр финалга киириэхтэрэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0