Ил Дархан э.т. Айсен Николаевы кытта быһа биэрии кэмигэр «Якутия» авиахампаанньа рейстэрэ хойутаан, дьону эрэйдииллэрин, бу кыһалҕа хаһан быһаарыллыан сөбүн ыйыталастылар.
edersaas.ru
«Якутия» авиахампаанньа супер-джеттэрин мотуордара биир кэмҥэ алдьанан, ону сатаан уларыппакка көтүөхтээх рейстэр тардылыннылар. Дуогабар быһыытынан, кылгас кэмҥэ эргэ мотуордары уларытыахтаах французскай хампаанньа үлэтин толорбото.
Бу сытыы боппуруос РФ Бырабыыталыстыбатын таһымыгар быһаарыллар. Дойду Бырамыысыланнаска миниистирин Денис Мантуровы кытта көрсөн кэпсэтиибитигэр профильнай министиэристибэҕэ уустук балаһыанньаны көннөрөргө үлэ бара турарын эттэ.
Бастатан туран, Арассыыйатааҕы транспортнай лизинговай хампаанньа иһинэн эргэ мотуордары уларытар, саҥардан биэрэр пуонда тэриллиэҕэ. РФ уонна «Сухой» супер-джет концерн икки ардыларыгар үп-харчы өттүнэн эбии мэктиэ баар буолуоҕа. «Якутия» авиахампаанньа мотуордарын уларытар курдук кыһалҕа аны хатыланыа суоҕун эрэннэрдилэр», — диэн эттэ Айсен Николаев.
Марианна Тыртыкова, «Саха сирэ», edersaas.ru