Москваҕа ыытыллыбыт «Аһаҕас инновациялар» форум чэрчитинэн «Венчурнай инвестор – 2018» национальнай бириэмийэни туттарыыга «Якутия» венчурнай хампаанньа Арассыыйа үс бастыҥ инвестиционнай-венчурнай пуондатын кэккэтигэр киирдэ.
edersaas.ru
«Венчурнай инвестор» национальнай бириэмийэни 2014 с. Арассыыйатааҕы венчурнай инвестирование ассоциацията тэрийбитэ. Бу сыллар тухары суолталаах бэлиэ дойду таһымнаах венчурнай Оскарга тэҥнээх буолла.
Кыайыылаахтары икки түһүмэххэ арааран сүүмэрдээбиттэр. Бастаан 50 кыттааччыны испииһэктээбиттэр. Ол кэннэ топ-менеджердэр, дойду бөдөҥ венчурнай инвестиционнай пуондаларын, сайдыы институттарын, федеральнай уонна регионнааҕы былаастар салайааччылара састааптаах анал дьүүллүүр сүбэ куонкуруска кыттар тэрилтэлэртэн бастыҥнары талбыт. Дьүүллүүр сүбэ чилиэннэрэ куоластааһын түмүгүнэн кыайыылаахтары быһаарбыттар.
«Якутия» венчурнай хампаанньа «Венчурнай инвестор» национальнай бириэмийэ «Реальнай секторга бастыҥ инвестор» диэн номинациятыгар кыайыылааҕынан тахсыбыт.
Кыайыылаахтары эҕэрдэлииригэр дьүүллүүр сүбэ чилиэнэ, СБВК Управляющай хампаанньатын генеральнай дириэктэрэ Денис Черкасов:
— Ырыынак эйгэтигэр бастыҥтан бастыҥнары өйөөн туран, биһиги венчурнай инвестированиеҕа дьон актыыбынаһын көҕүлүүбүт, кинилэр имиджтэрин көтөҕөн, сайдыы саҕахтарыгар сирдиибит, — диэн бэлиэтээтэ.
Елена ПОТОЦКАЯ, «Саха сирэ» хаһыат, edersaas.ru
Хаартыска: интэриниэттэн