“Саха полумарафона – 2017” сүүрүүнү таптааччылары бу өрөбүлгэ түмүөҕэ

Ааптар: 
Бөлөххө киир:

Бу өрөбүлгэ, атырдьах ыйын 13 күнүгэр, өрөспүүбүлүкэ киин куоратыгар Физкультурник күнүгэр анаммыт “Якутский полумарафон – 2017” (“Саха полумарафона – 2017”) маассабай сүүрүү буолар. Баҕалаахтар саастарынан наарданан биэс, уон уонна сүүрбэ биир биэрэстэҕэ сырсыахтара.

edersaas.ru


Старт сарсыарда 8-00 чааска бэриллиэҕэ. 6-30-тан 7-30 диэри күрэстэһиигэ кыттарга регистрацияны ааспыттарга анал чиптэр (дистанцияны төһө бириэмэнэн түмүктүүрү хонтуруоллуур тэрил) түҥэтиллиэхтэрэ.

Куоталаһааччылар “Туймаада” стадион – Лермонтов – Петровскай — Ойуунускай – Поярков – Петр Алексеев – Лермонтов – “Туймаада” стадион маршруттаах биэс биэрэстэ уһуннаах эргиири сүүрүөхтэрэ.

Биэс, уон уонна сүүрбэ биир биэрэстэҕэ үөлээннээхтэрин ортотугар миэстэлэспиттэр тэрийээччилэр туруорбут анал бириистэринэн бэлиэтэниэхтэрэ. Дистанцияларын түмүктээбиттэргэ барыларыгар өйдөбүнньүк мэтээллэр туттарыллыахтара.

Оҕолор сүүрүүлэрэ субуота күн, атырдьах ыйын 12-гэр, эмиэ “Туймаада” стадиоҥҥа буолуо.

Күрэхтэһии чэрчэтинэн “Бежим с добром” аһымал аахсыйа ыытыллыа. Онно ким баҕалаах 100 солкуобайга браслет атыылаһан бу тэрээһин кыттыылааҕынан буолуон сөп. Киирбит үп бүтүннүүтэ Пастухова Вика уонна Софронов Вася эмтэниилэригэр бэриллиэҕэ. Ону сэргэ, өрөбүлгэ, күрэстэһии түмүктэниитэ, 11-15 ч., “Туймаада” стадиоҥҥа эмиэ итинник ааттаах аһымал кэнсиэр саҕаланыаҕа. Онно Варя Максима, Zavod, Алена diva Яковлева, Василена Шарина, Айсен Аммосов, Hitsvint, Snow voice кыттыахтара.

Виктор Салтыков, “Якутский полумарафон – 2017” күрэхтэһии дириэктэрэ, “Fitness Life” фитнес-кулууп салайааччыта, триатлон ахсаабат пропагандиһа:

— Күрэхтэһиибитин үтүө үгэскэ кубулутан сыллата ыытар уонна норуоттар икки ардыларынааҕы таһымҥа таһаарар баҕалаахпыт. Тэрээһиммит сыалынан-соругунан төһө кыалларынан элбэх киһини чэбдик олоххо тардыы, физкултууранан дьарыктаныыга көҕүлээһин, сүүрүүнү пропагандалааһын буолар. Кэнэҕэһин, кыттааччыларбыт уопутурдахтарына, марафоҥҥа куоталаһыыны тэрийэр ыра санаалаахпыт.

Роман ПОПОВ, «Саха сирэ» хаһыат, edersaas.ru

Ааптар хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0