Саха Өрөспүүбүлүкэтин бырабыыталыстыбатын бэрэссэдээтэлин солбуйааччы э.т. Ольга Балабкина бээтинсэҕэ Бурятия өрөспүүбүлүкэтээҕи “Ульгэр” куукула тыйаатырын уус-уран салайааччытын, Бурятия искусствотын үтүөлээх деятелин Эрдэни Жалцановы кытта көрүстэ.
Итиэннэ бу көрсүһүүгэ кыттыыны ыллылар – кукловод-артыыс, Бурятия норуодунай артыыската Алла Натансон, Үүнэр көлүөнэ тыйаатырын уус-уран салайааччыта, РФ үтүөлээх, СӨ норуодунай артыыһа Алексей Павлов, Үүнэр көлүөнэ тыйаатырын дириэктэрэ, СӨ култууратын үтүөлээх үлэһитэ Матрена Павлова, СӨ култууратын министиэристибэтин отделын салайааччы Ирина Энгелис.
Манна, Бурятия өрөспүүбүлүкэтээҕи “Ульгэр” куукула тыйаатыра түөрт төгүл Арассыыйа улахан престижтээх «Көмүс мааска» театральнай бириэмийэтин лауреатынан буолбутун санатар наадалаах.
СӨ Баһылыгын уонна бырабыыталыстыбатын пресс-сулууспата иһитиннэрэринэн, формальнайа суох быһыыга аһаҕас кэпсэтиигэ, цифровой эйгэҕэ үүнэн иһэр эдэркээн көрөөччү ирдэбиллэригэр тыйаатыр бүгүн төһө эппиэттэһэрий, диэн аныгы тыйаатыр иннигэр турар тоҕоостоох боппуруостар дьүүллэһилиннилэр. Кырачааннар кэрэни кэрэхсии, өйдүү улааталларыгар тугу гыныахха? Аныгы көлүөнэ оҕолор олохторугар бэйэтин дьоһуннаах миэстэтин ыларын туһугар тыйаатыр хайдах-туох уларыйыан, хайа хайысханы тутуһуон сөптөөҕүй?…
Маннык хабааннаах ыйытыылары Ольга Балабкина ыалдьыкка, Бурятия тыйаатырын худругар Эрдэни Жалцановка биэрдэ.
Бурятия искусствотын диэйэтэлэ тыйаатыр сүрүн миссиятын билигин, оҕону тыйаатыр алыптаах эйгэтигэр төннөрүүгэ көрөр.
«Оҕону билигин тугунан да сөхтөрбөккүн. Ол гынан баран, биһиги бэлиэтии көрөрбүтүнэн, оҕолор син-биир, урукку курдук, судургу, өрүү баар тиэмэлэри олус интэриэһиргииллэр – үтүө уонна мөкү санаа туһунан, доҕордоһуу, дьиэ кэргэн, таптал туһунан… Оҕону наар күллэрэ, аралдьыта эрэ сатыа суохтаахпыт… Урукку, үтүө остуоруйалар биһиги оҕолорбутугар наадалар”, — диэтэ Эрдэни Жалцанов.
Бурятиятааҕы куукула тыйаатырын уус-уран салайааччыта, төрөппүттэр көҕүлээһиннэрэ, кинилэр оҕолорун иллэҥ кэминэн дьиҥнээхтик интэриэһиргииллэрэ, дьарыгыраллара, тыйаатырга дьиэ кэргэнинэн сылдьыы, көрбүтү бииргэ ырытыһыы, оҕону кытта санаа атастаһыы манна олус улахан суолталааҕын бэлиэтээтэ.
Бурятия Өрөспүүбүлүкэтин «Ульгэр» куукула тыйаатырын гастрола Дьокуускайга балаҕан ыйын 19-24 күннэригэр «Большие гастроли» федеральнай бырагыраама чэрчитинэн бара турар.
Үүнэр көлүөнэ уонна П.А. Ойуунускай аатынан Саха тыйаатырын сценаларыгар «Ульгэр» куукула тыйаатыра хас да испэктээги көрдөрүөҕэ. Онтон биирдэстэрэ «Поющая стрела» — «Көмүс мааскалаах» испэктээк.
Бэйэбит корр.