Киһи киһиэхэ соччо итэҕэйбэт үйэтэ кэлбит быһыылаах. Бэл диэтэр, чугас ыалларгыттан тугу баҕарар күүтүөххэ сөп эбит.
Вера МАКАРОВА, «Саха сирэ» хаһыат, https://edersaas.ru/
Уус Алдан улууһун полициятыгар биир дьахтар эрийэн, кини дьиэтин күүлэтиттэн 25 киилэ убаһа этин уоран барбыттарын туһунан тыллаабыт. Итинэн киниэхэ 8 тыһ. солк. тахса суумалаах хоромньу оҥоһуллубут.
Миэстэтигэр биллибитинэн, бу дьахтарга ити иннинээҕи күн ыала киһи киирэ сылдьыбыт. Уонна дьиэтигэр барарыгар, күүлэҕэ сыппыт кууллаах эти таарыччы кыбынан тахсыбыт. Итиччэлээх эти бэйэтэ сии барбатах, хас да бытыылка арыгыга батарбыт.
Оперативниктар уорбаланааччыны туттулар — урут халааһыҥҥа түбэһэн сууттана сылдьыбыт 43 саастаах киһи. Бу чахчынан «уоруу» ыстатыйанан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Санатар буоллахха, маныаха маарынныыр дьыала бу дьыл саҥатыгар Таатта улууһугар тахсыбыта. Уоруйаҕы суукка иһинэн булбуттара. Онно 58 саастаах киһиэхэ 49 саастаах ыала киһи ыалдьыттыы кэлбит, кинини дьиэлээх хаһаайын балыгынан күндүлүөх буолан, сайыҥҥы дьиэҕэ бииргэ тахсыбыттарыгар, ыалдьыт онно хаһаас эт элбэҕин, ааннара хатамматын өйдөөн көрбүт. Уонна кэлин ыаллара дьиэлэригэр суохтарынан туһанан, 25 киилэ убаһа этин уоран барбыт, барытын эмиэ бэрт түргэнник батарбыт.
Вера МАКАРОВА, «Саха сирэ», https://edersaas.ru/
Хаартыска: интернеттэн.