Дьокуускайга хотугу өрүстэр тардыыларын чинчийиигэ норуоттар икки ардыларынааҕы XXI симпозиум түмүктэннэ.
РНА Саха сиринээҕи салаатын Наукаҕа киинин пресс-сулууспатын салайааччы Ньургуйаана Стручкова биһиэхэ иһитиннэрбитинэн, симпозиумҥа гидрология учуонайдара кэллилэр. АХШ, Канада, Финляндия, Швеция, Норвегия, Франция, Япония, Германия, Эстония дойдуларыттан 30-тан тахса учуонай кытынна.
Кэнники уонча сылга өрүстэр тардыыларыгар гидрологическай уларыйыылары үөрэппит Япония Нагоя университетын профессора Тетсуя Хияма килиимэт уларыйыытыттан сиэттэрэн, өрүс алын өттүнээҕи уу аҕыйаабытын бэлиэтээтэ. «Бу феномен! Оттон Саха сирин киин өттүгэр үөһээҥҥи уу элбии турара көстөр. Өрүс алын өттүгэр тахсар бу дьайыылар салгын температурата үрдүүрүттэн, паар элбээһиниттэн,ону үүнээйи иҥэриититтэн тахсар. Маннык балаһыанньаҕа Дьааҥы, Индигир, Халыма өрүстэр түбэһэллэр», – диэн быһаарда.
Учуонай билигин Өлүөнэҕэ уу быраҕыллыытын барытын кэтээн көрөр кыахтара суоҕун, онон өрүс баһыгар чинчийиини салгыыллара наадатын эттэ.
Учуонайдар өрүс алын тардыытыгар булбут көстүүлэрэ туох уларыйыыларга тириэрдиэн сөбө билиҥҥитэ биллибэт. Профессор быһаарбытынан, гидрологтар эрэ буолбакка, араас уобаластан учуонайдар биир кэлим көрүүлэрэ наада.
Симпозиум чэрчитинэн, учуонайдар Улахан Тарыҥ сир аннынааҕы дьүүктэтигэр научнай экскурсияҕа сырыттылар.
Надежда ЕГОРОВА, «Саха сирэ» хаһыат, edersaas.ru