Алтынньы 10 — 15 күннэригэр Болгария Пловдив куоратын «Колодрум» спорт киинигэр бэтэрээннэр ортолоругар классическай уонна көҥүл тустууга аан дойду чөмпүйэнээтэ буола турар. Үгэс быһыытынан, сыллата ыытыллар түһүлгэҕэ түөрт уонча дойдуттан 600-тэн тахса аҕам саастаах тустуук кыттар.
Бу иннинэ 70 — 80-наахтар кытары тустубут буоллахтарына, тэрийээччилэр быйылгыттан кыттааччылар саастарын 60-нан хааччахтыырга быһаардылар. Онон көбүөр маастардара биэс ыйааһыҥҥа: А (35-40 саастаахтар), В (41-45), С (46-50), D (51-55), E (56-60) күүстэрин холоһуохтара.
Пловдив түһүлгэтигэр көҥүл тустууга Арассыыйа сүүмэрдэммит хамаандатыттан алта саха тустууга кыттар: 40-45 саастаахтарга Дьокуускай куорат ДЮСШ-3 тириэньэрэ Василий Уйгуров (70 кг), Чурапчы улууһуттан спорт киинин дириэктэрэ Александр Андреев (74 кг), Тааттаттан Григорий Массаев (88 кг), 56-60 саастаахтарга Уус Алдантан Василий Шепелев (62 кг), Виктор Черкашин (62 кг) уонна Вадим Данилов (70 кг).
Бэҕэһээҥҥи, алтынньы 13 күнүнээҕи туругунан, 70 киилэҕэ диэри ыйааһыҥҥа боруонса мэтээли былдьаһыыга Василий Уйгуровпыт Катсуеши Итоҕа (Япония) 0:7 ахсаанынан, оттон уонна 62 киилэлээхтэргэ Виктор Черкашиммыт эмиэ Япония бөҕөһүгэр Сусуму Хашиураҕа 2:+2 ахсаанынан хоттортоон, бэһис буоллулар.
Билиҥҥитэ Иран уонна Украина бөҕөстөрө иккилии кыһыл көмүс мэтээллээхтэр. Арассыыйа, Швеция, Израиль, Монголия, АХШ, ЮАР, Польша уонна Венгрия биирдии чөмпүйүөннээхтэр.
Роман Попов, «Саха сирэ» хаһыат, edersaas.ru