Сайтпытыгар бу дьыл балаҕан ыйын 21 күнүгэр «Ньурбаҕа полиция подполковнигын саанан ытан өлөрдүлэр» диэн иһитиннэриибит бэчээттэммитэ. Онно Ньурба улууһугар ис дьыала уорганнарын астаапкаҕа сылдьар подполковнигын саанан ытан өлөрбүттэрин туһунан суруйбуппут. Биһиги редакциябытыгар өлүөхсүт Николай Акимов чугас дьонуттан сурук кэллэ, ону хайдах баарынан бэчээттиибит.
Киhи бу орто дойдуга айа-тута, олоҕун кэскилин кэҥэтэ, олоҕор үтүө суол хааллара кэлэр. Оннук киhинэн буолар этэ, Ньурба улууһун Убайаан түөлбэтин төрүт олохтоохторо, элбэх оҕолоох учууталлар дьиэ кэргэннэрэ — Парасковья Ивановна, Аким Осипович Акимовтар — мурун бүөтэ уоллара Николай Акимов. Кини оҕо сааһа элбэх доҕордонон, дьоллоохтук ааспыта. Ытык иэhин Монголияҕа толорбута, онтон Тыа хаhаайыстыбатын техникумун үөрэнэн бүтэрэн баран, Чурапчы Дириҥиттэн төрүттээх, тапталлаах доҕорун Анастасияны көрсөн, ньир-бааччы дьоhун ыал буолан, биэс оҕоҕо күн сирин көрдөрөн, куоракка олохсуйбуттара.
Киһи киэнэ мааныта үөрэҕи-билиини батыhар буолан, Тыа хаhаайыстыбатын, Россия Ис дьыалаҕа министиэристибэтин академияларыгар туйгуннук үөрэнэн, дириҥ билиилээх-көрүүлээх, сыаналанар исписэлиис буолбута.
Идэни баhылыырыгар, бастаан тыа хаhаайыстыбатын чэрчитинэн, онтон үөрэх эйгэтигэр, салгыы бэрээдэги көрөр-араҥаччылыыр милииссийэ үлэhитэ буолбута. Ол сулууспалыыр кэмигэр «Милицейскай дьиэ кэргэн» куонкуруска кыттаннар, кыайыылаах тахсыбыттара.
Милииссийэ, кэлин полиция сотруднига Николай Акимович Черскэйдээҕи Ис дьыала отделын начальнигынан, онтон Үөһээ Бүлүүтээҕи Ис дьыала отделын начальнигын солбуйааччытынан үтүө суобастаахтык, бэриниилээхтик үлэлээбитэ. Ханна да тиийбитин иhин Николай дьону түмэр, бэйэтин хаһан да үрдүктүк туттубат, кырдьаҕаhы-кыамматы туора туппат, мэлдьи сымнаҕас майгылаах, сөбүгэр дьээбэлээх, бириэмэтигэр кытаанах ирдэбиллээх буолааччы… диибит эрэ билигин.
Уопсастыбаҕа кутталлаах сидьиҥ киhи күндү бырааппыт, тапталлаах кэргэн, аламаҕай аҕа, эйэҕэс эhээ, истиҥ доҕор, дьиҥнээх офицер Николай Акимович Акимовы саанан кэнниттэн ытан, сырдык тыынын быспыта абатын! Олус да соhумар!
Коля ити күн бэйэтэ оҕо сааhыттан таптаан сылдьар, бултуурга-алтыырга үөрэммит сиригэр, Бэс күөлүгэр, баҕар, биир эбит хатырыктааҕы, куhу аҕалан, дьоммун күндүлүөм диэн бараахтаабыта. Биһиги хомойобут: сиргэ кистэммит киhи үтүө аата дьон тылыгар тоҕо өлөрүөхсүт туоhулааhынынан барыахтааҕый? Уруккуттан куhаҕан быhыыны оҥорбут сидьиҥ киһи тоҕо көҥүлэ быhыллан хаайыыга хаайыллыбатаҕай? Өлөрүөхсүт киhини дьаhайан баран, бырааппыт саатын дьиэтигэр илдьэн кистээн баран, холкутук балык атыылыы олорбута кыһыытын-абатын!
«Хас биирдии киһи чиэс, билии, сокуон диэн тылларынан салайтаран үлэлиэхтээх» диир этэ, астаапкаҕа сылдьыбыт подполковник, милииссийэ туйгуна, бочуоттаах сынньалаҥҥа да тахсан баран, АЛРОСА Ньурбатааҕы ГОК инженеринэн үлэтин саҕалаан, үтүө суобастаахтык үлэлии сылдьыбыт Николай Акимович Акимов…
Күндү киһибит балаҕан ыйын 19 күнүгэр сырдык тыына быстыбыта, күннэр элэстэнэн ааһаллар, номнуо 9 хонуга үүннэ… Колябытын «сиэбит» ыар буруйдаах сокуон хараҕынан кытаанахтык эппиэттииригэр, силиэстийэ кырдьыктаахтык, ирдэбиллээхтик ыытыллыа диэн эрэнэбит!
Дьиэ кэргэнэ, бииргэ төрөөбүттэрэ.
Хаартыскаларга: подполковник Николай Акимов.