Бу сыл кулун тутарыттан Саха сиригэр Үтүө санаа сылыгар анаммыт «Олох олорор иһин махтанабын» («За счастье жить благодарю») ааксыйа саҕаламмыта. Ааксыйа «Сахамедиа» ААУо, Саха сиринээҕи Медицина балаататын, «Арассыыйа почтатын», СӨ Доруобуйа харыстабылын министиэристибэтин уопсастыбаннай сэбиэтин, Дьокуускай к. уопсастыбаннай балаататын өйөбүллэринэн ыытыллар.
Надежда ЕГОРОВА, «Саха сирэ» хаһыат, edersaas.ru
Үтүө санаа тэрээһинин сүрүн соругунан үрүҥ халааттаах аанньаллары, доруобуйа харыстабылын тэрилтэлэрин уопсастыба билиниитэ, идэ суолтатын үрдэтии, эмчиттэри көҕүлээһин, социальнай статустарын үрдэтии уонна нэһилиэнньэ доруобуйатын харыстабылыгар эмтиир тэрилтэлэр оруолларын бөҕөргөтүү буолар.
Ыам ыйын 12 күнүгэр бу ааксыйаҕа аналлаах «төгүрүк остуол» ыытылынна.
СӨ Медицинаҕа балаататын бэрэссэдээтэлэ Светлана Давыдова, Арассыыйа почтатын Саха сиринээҕи салаатын исписэлииһэ Ольга Хохолова уо.д.а. кытыннылар. Ону тэҥэ, 2013 с. ааксыйа кыайыылаах балыыһатын бэрэстэбиитэллэрэ: Өрөспүүбүлүкэтээҕи 2 №-дээх балыыһа—Суһал медицинскэй киин кылаабынай бырааһын солбуйааччы Надежда Петрова, Дьокуускай к. 1 №-дээх поликлиникатын кылаабынай бырааһа Антонина Эверстова санааларын атастастылар.
«Медицина балаатата ааксыйаны быйыл кулун тутарга саҕалаабыта. Биһиги эмчиттэр үлэлэрэ төһөлөөх ыараханын, эппиэтинэстээҕин билэбит», – диэн Светлана Давыдова кылгастык ааксыйа сыалын-соругун, суолтатын билиһиннэрдэ.
«2013 с. ааксыйаҕа өрөспүүбүлүкэтээҕи балыыһалар ортолоругар биһиги балыыһабыт Людмила Оконешникова салайар неврологияҕа отделениета бастаабыта. Махтал суруктаах аккырыыккалар улуустартан уонна өрөспүүбүлүкэ тас өттүттэн кэлбиттэрэ. Элбэх эҕэрдэни сүрэх-тымыр регионнааҕы киинин уонна сыҥаах-сирэй ыарыыларын эмтиир отделение хирурдара Олег Ширко, Анатолий Комиссаров, Альберт Васильев, Людмила Оконешникова уо.д.а. ылбыттара кэрэхсэбиллээх этэ. Ыарыһах махтала ханнык да наҕараадатааҕар күндү. Быйыл элбэх аккырыыкканы медицинскэй сиэстэрэлэр тутан эрэллэр», – диэн Суһал медицинскэй киин кылаабынай бырааһын солбуйааччы Надежда Петрова кэпсээтэ.
Ольга Хохолова иһитиннэрбитинэн, билиҥҥитэ сибээс 427 отделениетыгар 9 тыһыынча аккырыыкка киирдэ. Билигин ааксыйа бүтүөр диэри өссө да икки нэдиэлэ баар. Бүгүҥҥү күннээҕи туругунан, 550 эмчит улуустартан уонна өрөспүүбүлүкэ таһыттан махтал, билинии суруктаах аккырыыккалары тутта.
Ким баҕарар почта отделениетыгар кэлэн анал аккырыыкканы босхо ылан, эмтэммит балыыһатын аадырыһын, бырааһын аатын суруйан ыытар. Түмүк бэс ыйыгар таһаарыллыаҕа.
ЫСПЫРААПКА:
«Олох олорор иһин махтанабын» ааксыйа 2013 с. саҕаламмыта. Бу сыл сайыныгар өрөспүүбүлүкэ эмчиттэрэ махтал суруктаах биэс тыһыынча курдук аккырыыкканы туппуттара.
Ааксыйаҕа Дьокуускай к., Нерюнгри, Чурапчы, Өлүөхүмэ, Хаҥалас уонна Кэбээйи улуустара кыттыбыттара.
— Бырамыысыланнай куораттар эмтиир тэрилтэлэрин ортолоругар кыайыылааҕынан – Нерюнгри оройуонун киин балыыһата (кылаабынай быраас Ньургун Степанов);
— Киин улуустар ортолоругар – Сунтаардааҕы киин балыыһа хирург-бырааһа Константин Павлов (кылаабынай быраас Иван Попов);
— Дьокуускай к. эмтиир тэрилтэлэрин ортолоругар – 1 №-дээх поликлиника ыарыыны сэрэтиигэ отделениетын сэбиэдиссэйэ Ефросинья Дьячковская уонна кылаабынай быраас Алевтина Эверстова;
— Биирдиилээн эмчиттэргэ: Дьөппөннөөҕү фельдшер-акушер пуунун биэлсэрэ Таисия Корякина уонна Кэбээйитээҕи киин балыыһа акушер-гинеколога Ольга Левина буолбуттара.
Надежда ЕГОРОВА, «Саха сирэ» хаһыат, edersaas.ru