Иван Ярыгин аатынан норуоттар икки ардыларынааҕы Гран-при турнирга Россия спортивнай тустууга федерациятын ирдэбилин быһыытынан 2016 сылга эриэ-дэхси көрдөрүүнү ситиспит 12 бөҕөспүт киллэрилиннэ. Кинилэр кимнээхтэрий? Туох-ханнык көрдөрүүнү ситиһэн, маннык улахан таһымнаах түһүлгэҕэ кыттар быраабы ыллылар?
57 киилэҕэ – Дьокуускайга ыытыллыбыт Россия чөмпүйэнээтин боруонса призера Арыйаан Тютрин, улуу тренер Д.П.Коркин кэриэһигэр норуоттар икки ардыларынааҕы турнир кыайыылааҕа Ньургун Александров, 50 кг ыйааһыннаахтарга эдэрдэргэ Европа күрэхтэһиитигэр бастаабыт Георгий Окороков киллэрилиннилэр. Кинилэргэ, Д.Г.Миндиашвили аатынан Красноярскайдааҕы Тустуу академиятын Бүтүн Россиятааҕы турнирын кыайыылааҕа Эдуард Григорьев эбиллэн биэрдэ.
61 киилэҕэ – Россия чөмпүйэнээтигэр ситиһиилээхтик тустубут Егор Пономарев, Виктор Рассадин, Ньургун Скрябин, Вячеслав Ефремов кыттыахтара. Манна даҕатан эттэххэ, Ньургун Скрябин – Красноярскайдааҕы И.Ярыгин турнирын былырыыҥҥы кыайыылааҕа. Виктор Рассадин АХШ-ка ыытыллыбыт аан дойду кубогын хамаанданан иккис миэстэлээҕэ. Оттон Егор Пономарев – Дмитрий Петрович турнирыгар тэҥнээҕин булбатаҕа. Бу уолаттар этэргэ дылы, критерийгэ иккилиитэ ахтылыннылар.
65 киилэҕэ – Виктор Степанов Россия чөмпүйэнээтигэр уонна И.Ярыгин турнирыгар бочуоттаах бэһис миэстэлэргэ тахсан, дойду сүүмэрдэммит хамаандатын састаабыгар киирбитэ. Оттон өрөспүүбүлүкэ чөмпүйүөнэ Константин Власов Казахстаҥҥа, Д.Кунаев кэриэһигэр норуоттар икки ардыларынааҕы турнирга кыайыылааҕынан тахсыбыта.
70 киилэҕэ – Индия Пуна куоратыгар ыытыллыбыт норуоттар икки ардыларынааҕы турнирга бастакы миэстэни ылбыт Тимур Николаев Красноярскайдааҕы түһүлгэҕэ киллэриллибитэ.
97 киилэҕэ – Россия чөмпүйэнээтин боруонса призера Евгений Коломиец тустуоҕа.
Өссө балаһыанньа быһыытынан И.Ярыгин турнирын боруонса призера, Россия чөмпүйүөнэ, олимпиец Виктор Лебедев кыттар бырааптаах этэ, ол эрээри, аатырбыт бөҕөспүт Красноярскайдааҕы турниры көтүтэргэ сананна. Манна сыһыаран эттэххэ, спорт үтүөлээх маастара салгыы тустарын дуу, тустубатын дуу бүтэһиктээхтик быһаарына илик.
Үөһэ ахтыллыбыт бөҕөстөрү тэҥэ СӨ кылаабынай тренерэ Владимир Кириллин эппитин курдук, эбии сайаапка быһыытынан Ярыгин турнирыгар эдэр тустууктар киирээри бэлэмнэнэ сылдьаллар. Кинилэр ортолоругар Николай Охлопков, Айхан Антонов, Дьулустан Булатов, Герман Устинов уо.д.а. бааллар.
Ханныгын да иһин, састаап бойобуой. Уолаттарбыт ситиһиилээхтик тусталларыгар баҕарыаҕыҥ.
Петр ПАВЛОВ, “Саха сирэ”, edersaas.ru