Сыл аайы ыытыллар Ыччат ыһыаҕа быйыл Мирнэй куоракка бэс ыйын 30 күнүттэн от ыйын 2 күнүгэр диэри буолуоҕа.
Буоларын курдук, кыттааччылар палаточнай куоракка олоруохтара. Бу күн «Саха КВН» сайыҥҥы кубогын редактурата, ону таһынан кэрэ куоларга аналлаах «Алмазная краса», хомус, гитаранан ырыа, Экология сылыгар аналлаах хоһоон ааҕыытын сүүмэрдиир түһүмэхтэрэ ыытыллыахтара.
Иккис күн ыһыаҕы үөрүүлээхтик арыйыахтара. Күн устата үҥкүүһүттэр, эдэр тимир уустара, олоҥхо толорооччулар, спортсменнар күрэхтэһиэхтэрэ. Киэһэ кэрэ куоларга аналлаах «Алмазная краса», «Саха КВН» сайыҥҥы лигата кыттааччылары түмүө. Саха эстрадатын артыыстара кыттыылаах уоттаах-күүстээх дискотеканан ыһыах икккис күнэ түмүктэниэҕэ.
Үһүс күн Күнү көрсүүнэн саҕаланыа. Куонкурустар түмүктүүр түһүмэхтэрэ буолуохтара. Үс күннээх күрэхтэһии түмүгүнэн ким кыайбыта биллиэҕэ.
Хамаандалар үс бөлөххө: 1. Киин оройуоннар; 2. Хоту оройуоннар; 3. Уопсастыбаннай түмсүүлэр диэн арахсаллар. Үгэс быһыытынан, кыайыылаах икки улуус хамаандалара саҥа массыынанан «дьиэлиэхтэрэ». Быйыл даҕаны сүрүн бириискэ икки массыына турар (биирин Ыччат министиэристибэтэ, иккиһин улуус дьаһалтата уйуналлар). Ол туһунан Мирнэй оройуонун ыччатын кэмитиэтин бэрэссэдээтэлэ Алексей Болотин маннык эттэ: «Дьокуускай куораттан Мирнэйгэ диэри тыһыынчаттан тахса биэрэстэ. Онуоха диэри уонна төттөрү массыынаны сүүрдэн илтэхпитинэ, саҥа тиэхиньикэ аатыттан ааһар. Ол иһин, биһиги билигин массыына атыылаһар сертификаты туттарар туһунан толкуйдуу сылдьабыт. Атын куонкурустарга эмиэ сыаналаах бириистэр баар буолуохтара. Ыһыах ыытыллар сирэ киэҥэ суох буолан, тэрээһиннэр аҕыйах хаамыылаах сиргэ ыытыллыахтара. Ыһыах сүрүн тиэмэтэ — норуоттар доҕордоһуулара. Онно анаан анал былаһаакка оҥорон араас омук култууратын көрдөрөр ассамблея тэрийиэхпит. Сайын биһиги куораппытыгар эдэр дьон кэлиҥ, сылдьыҥ, Ыччат ыһыаҕар көхтөөх кыттыыны ылыҥ диэн ыҥырабыт».
Ыһыах балаһыанньата манна баар.
2016 сыллаахха Аммаҕа буолбут Ыччат ыһыаҕын кыайыылаахтара, хаартыска, видео.
2015 сыллааҕы Ыччат ыһыаҕын түгэннэрэ манна баар.
Анастасия Алексеева, «Саха сирэ» хаһыат, edersaas.ru