Быйылгы сыл куоракка Үтүө санаа сылынан биллэриллибитэ. Онон, биирдиилээн дьон уонна тэрилтэлэр көҕүлээһиннэринэн араас хайысхаларынан үтүө саҕалааһыннар, кэрэхсэбиллээх дьаһаллар тиһигин быспакка тэриллэллэр.
“Киин куорат доброволецтара” уопсастыбаннай хамсааһын чилиэннэрэ, сайаҕас санаалаах эдэр ыччаттар, бэтэрээннэргэ уонна кырдьаҕастарга көмөлөһөллөр. Ол курдук, ааспыт өрөбүлгэ Дьокуускай куорат бэтэрээннэрин Сэбиэтин дьиэтин иннин ыраастаатылар, сибэкки олордор буору бэлэмнээтилэр, кулуумбалары туруордулар итиэннэ уонтан тахса дьөлүһүөн угун олортулар.
Сарсыныгар доруобуйа харыстабылын бэтэрээнэ, сааһын тухары 3 №-дээх өрөспүүбүлүкэтээҕи балыыһаҕа үлэлээбит Юлия Иванова даачатыгар тахсан сэтиэнэх оту ыраастаатылар, хортуоппуйун сирин тиэрэн биэрдилэр.
— Маннык уопсастыбаннай тэрилтэ баарын туһунан мин тэлэбиисэргэ “Саҥа күн” биэриигэ истибитим, — диир Юлия Егоровна. — Эдэр дьон көрдөһүүбүн ылынан кэлэн көмөлөспүттэригэр махтанабын. Үтүө санаа сылынан куораппытыгар амарах санаалаахтар элбии туралларыгар баҕарабын.
«Столичнай ырыынак» эргиэн комплексын бибэт киһи суоҕа чахчы. Бэҕэһээ манна комплекс салалтатын итиэннэ регионнааҕы эргиэн хампаанньатын көҕүлээһиннэринэн, социальнай өйөбүл сэбиэтин уонна Строительнай уокурук элбэх оҕолоох ыалларын кэмитиэтин өйөбүллэринэн, оҕо оонньуур былаһаакката баар буолла.
Раиса СИБИРЯКОВА, “Саха сирэ” хаһыат, edersaas.ru