Өймөкөөн улууһун саамай ыраах сытар нэһилиэгин Сордоҥноох туһунан сайтпытыгар хаста даҕаны сырдатан турардаахпыт. Манна командировкаҕа сылдьан хас биирдии тэрилтэҕэ эдэр дьон тутаах, бас-көс үлэһит буоларын сэҥээрбиппит. edersaas.ru
Ол курдук, “Уйгу” ТХПК бэрэссэдээтэлинэн Маргарита Борисова үлэлиир:
— Хаһаайыстыбабытын 2012 сыллаахха тэриммиппит, билиҥҥитэ 13 төбө ынахтаахпыт. Үс үлэһиттээхпит — ыанньыксыты кытта собуот икки үлэһитэ баар. Сайыннары үүт тутабыт, эрийэн сүөгэй, арыы, суорат оҥорон атыылыыбыт. Аны аҕыйах сыллааҕыта ТХПК иһинэн маҕаһыын арыммыппыт. Ыйга биирдэ Аллараа Бэстээхтэн бородуукта аҕалан, манна чэпчэки сыанаҕа атыылыыбыт. Киин сиртэн ыраах буоламмыт, дьон бородууктаҕа наадыйар. Ордук саахары, бурдугу, тууһу кууһунан атыылаһаллар. Сыанабыт чэпчэки буолан, олохтоохтор табаары хамаҕатык ылаллар.
Эдэр киһи тыа сирин уустуктарыттан чаҕыйбакка, төрөөбүт сиригэр-уотугар олохсуйан, ынах-сылгы иитэр хаһаайыстыба тэринэн, маҕаһыын арынан, ньир-бааччы олорорун ыччакка холобурдаан сырдатабыт. Сордоҥноох сэргэх ыччатыгар – Маргаритаҕа ситиһиилэри баҕарабыт!
Айтана Аммосова, edersaas.ru