close
ЫЙЫТЫК: Харчыҥ тиийэр дуо?
· - Олох-дьаһах - Сэргэлээх

ЫЙЫТЫК: Харчыҥ тиийэр дуо?

Истипиэндьийэ – устудьуон кулгааҕар минньигэстик уонна күндүтүк иһиллэр тыл. Харчы кэлэрин ыйы быһа кэтэһии-манаһыы, ону туохха барыырбытын, ханна барарбытын-кэлэрбитин былааннаныы бөҕө буолабыт.

Хотугулуу-Илиҥҥи федеральнай университет устудьуоннара араас кээмэйдээх истипиэндьийэни ылабыт — Арассыыйа, өрөспүүбүлүкэ бүддьүөттэриттэн, эбиискэлээх, социальнай… Ити курдук, устудьуон кууруһуттан, үөрэҕиттэн, социальнай балаһыанньатыттан, төһө көхтөөҕүттэн көрөн харчы кээмэйин аттараллар. Ол эрээри, кыра буоллун, элбэх буоллун, истипиэндьийэ барыбытыгар көһүтүүлээх.

ХИФУ устудьуоннара ыйытыкка хоруйдууллар:

Виктор Кузьмин, автодорожнай факультет үһүс кууруһун устудьуона:

— Истипиэндьийэм тиийбэт. Аҥаардас истипиэндьийэнэн эрэ киһи ыйы туораабат дии саныыбын. Баҕар, таҥныбат, тэтэрээт, уруучука ылыммат, үчүгэйдик аһаабат усту­дьуон тиэрдэрэ буолуо. Миэхэ, хата, дьонум көмөлөһөллөр. Харчым сүрүннээн аһылыкпар, үөрэххэ туттар маллары атыылаһарбар уонна биирдэ-иккитэ күүлэйдиирбэр барар. Истипиэндьийэм үрдүүрүн туһугар, үөрэхпэр кыһалла сатыыбын.

Алик Васильев,  физическэй култуура уонна спорт институтун иккис кууруһун устудьуона:

— Истипиэндьийэттэн истипиэндьийэҕэ диэри харчыбын тиэрдэбин, эрдэ туохха барыырбын бы­­лаанныыбын. Харчыбын үксүгэр аска, таҥаска, сынньалаҥҥа барыыбын. Истипиэндьийэм үрдүүрүн туһугар, университекка ыытыллар тэрээһиннэргэ көхтөөхтүк кытта, үөрэхпэр кыһалла сатыыбын. Дьоммуттан харчы ыл­баппын.

Катя Неустроева, филологическай факультет төрдүс кууруһун устудьуона:

— Истипиэндьийэм сыана үрдээн туохха да тиийбэт буолла. Урут биир ыйга таах тиэрдэр этим. Билигин ый аҥаарыгар эрэ тии­йэр быһыылаах, ону даҕаны аһылыкпар эрэ. Дьонум эбии харчы ыытар буолан, истипиэндьийэ кэлиэр диэри тот сылдьабын. Истипиэндьийэм үрдүүрүн туһугар, “биэс” сыанаҕа үөрэнэ сатыыбын. Быстах-остох онно-манна үлэлиибин, онон үөрэхпэр даҕаны мэһэйдэппит түгэннэрим бааллар. Ол эрээри, атын үөрэх кыһаларынааҕар ХИФУ  биэрэр истипиэндьийэтэ элбэх.


ХИФУ “бакалавр” уонна “специалитет” бырагыраамаларынан үөрэнэр устудьуонун академическай истипиэндьийэтин кээ­мэйэ:

1 куурус

1 семестр – 3460 солк;

Туйгуннук үөрэнэр устудьуоннарга:

1 куурус – 6090 солк;

2 куурус – 6090 солк;

3 куурус – 7850 солк;

4 куурус – 8120 солк;

5 куурус – 8380 солк;

6 куурус – 8910 солк.

Үчүгэйдик үөрэнэр устудьуоннарга:

1 куурус – 5770 солк;

3 куурус – 6485 солк;

4 куурус – 6700 солк;

5 куурус – 7015 солк;

6 куурус – 7330 солк.

Лера ЛЬВОВА, «Саха сирэ» хаһыат, edersaas.ru

#бүгүн: 18
1
1

Сайт матырыйаалларын ааптар көҥүлэ суох ылар бобуллар.

Мин санаам:

4 + 2 =