Мин оҕо эрдэхпиттэн маскараат кэттэхпитинэ, Тымныы Моруос оҕонньортон бэлэх туттахпытына эрэ Саҥа Дьыл буолбутун курдук санааччыбын. Онон доҕотторум оҕо сылдьан туох маскараат буолбуттарын сурастым.
Сахаяна Жиркова, эдэр ийэ:
-
Оскуолаҕа үөрэнэ сылдьан, Саҥа Дьыл ахсын куруук маскараат кэтэр этибит.Мин үксүгэр мультик геройа буолааччыбын. Ол курдук, Дюймовочка, фея, принцесса, кутуйах буолбуппун ордук өйдөөн хаалбыппын. Онтон оҕо саадыгар сылдьан Бэйбэрикээн эмээхсин оҥорбуттарыгар хомойбутум аҕай. Билигин бэйэм ийэ буолан олорон, оҕобор маскараат оҥорортон соло булбаппын. Устудьуоннуу сылдьан көннөрү киэһээҥҥи былааччыйа эрэ кэтэн Саҥа Дьылы көрсөр эбит буоллахпына, билигин оҕобун кытта тэҥҥэ маскараат буолабын. Былырыын оҕо саадыгар оҕобунаан иккиэн кутуйахтар буолбуппут. Оҕону кытта оҕо буолан, дьикти алыптаах киэһэ бырааһынньык тыынын билиҥҥэ диэри билэбин.
Мирослав Бочкарев, ХИФУ устудьуона:
-
Маскараат буоларбын кыра эрдэхпиттэн сөбүлээбэппин. Төрдүс кылааска сылдьан, «Эһэ миискэ мүччүргэннээх сырыылара» диэн остуоруйа туруорбуппут. Онно эһэ оҕото буолбуппун өйдөөн хаалбыппын. Устудьуоннуу кэлэн баран, маскараат буола иликпин. Хата, төттөрүтүн, куруук бырааһынньыгы тэрийээччи буоламмын, атыттары күһэйээччибин. Атын дьон туох маскараат буолбутун көрөрбүн сөбүлүүбүн.
Нарыйа Варламова, суруналыыс:
-
Оҕо сылдьан эрэ маскараат буолар этим. Маскараат оҥосторбун, буоларбын сөбүлээбэппин. Тарбаҕар талааннаах, уруһуйдьут эрэ киһи тупсаҕай көстүүлээх маскарааты оҥороро буолуо дии саныыбын. Табыллыбатах маскараат кэтиэх кэриэтэ, буолбатах ордук дии саныыбын. Ол эрээри, киһи оскуолаҕа үөрэнэ сылдьан араас маскараат буоллаҕына, оонньоотоҕуна-көрүлээтэҕинэ эрэ Саҥа Дьылы өйдөөн хаалар эбит.
Сергей Иннокентьев, эдэр предприниматель:
-
Миигин кыра кылааска үөрэнэ сырыттахпына эмээхсин, оттон биир кыыһы оҕонньор оҥороннор, «Эриэппэ» остуоруйатын туруорбуппут. Онно төһө да аккаастана сатаабытым үрдүнэн күүстэринэн былааччыйа кэтэрдибиттэрэ. Онтон ыла Саҥа Дьылга маскараат буоларбын сөбүлээбэппин. Арай Хэллоуиҥҥа абааһы буолааччыбын. Оҕо сылдьан атын оҕолор курдук күлэ-үөрэ маскараат буолан, харыйа тула үҥкүүлээн, Саҥа Дьылы бэһиэлэйдик ылбыппын өйдөөбөппүн.
Айтана АММОСОВА