Ыкка, куоскаҕа нолуок киириэх үһү

Ааптар: 
Бөлөххө киир:

Үнүр даачабыттан киирэн иһэн, оптуобуска икки эмээхсин кэпсэтэрин иһиттим. Дьиэ кыылыгар нолуок киллэрэн эрэллэр, биир ыт нолуога 10 тыһ. солк., куоскаҕа 5 тыһ. солк. үһү дэһэллэр.

edersaas.ru

Ити сонуннарынан эмээхситтэр оптуобуһу толорон кэбистилэр. Эчи,  билэллэрэ-көрөллөрө да сүрдээх. Итэҕэйбэккэбин, сууматын иккиһин ыйыппыппар: “Оҕонньоор, хата, ыттаах, куоскалаах буоллаххына, биэнсийэҥ сыыһын таптайа сыт. Сокуону номнуо бигэргэппиттэр, аны көтүрбэттэр үһү”, — дэстилэр.

Сарсыныгар оҕо сааһым доҕоро Дьөгүөссэ эрийэн эмиэ, куорат сиригэр олорор киһи тугу биллиҥ-көрдүҥ, манна ыкка, куоскаҕа нолуок киллэрэллэрин туһунан батсаап оргуйан олорор диэн сонуннаах буолла. Батсаап хочуола түргэнник туолар, эмиэ соннук кэбэҕэстик уостар. “Ити курдук түһээн киллэрдэхтэринэ, букатын иэдэтэллэр. Сорохтор куорат сирдэригэр ыт-кус бэйдиэлээбит, ону хонтуруоллуур быһыылара үһү дииллэр да, хас биирдии дьиэни кэрийэ сылдьыбаттара чахчы. Арай, бу биһигинньиктэр, тыа сиригэр олорор дьон, этэргэ дылы, хас кутуйахтаахпыт кытта ытыс үрдүгэр көстөн турдаҕа. Кимтэн кистиэҥий?! Ити түһээннэрэ эмиэ тыа сирин дьонун сүнньүгэр сүктэриллэр буолбут”, — диэн үҥсэргээн төлөпүөннээбитэ. Хайдах баҕайыный, туох эрэ истээх быһыылаах дии олордохпуна, оруобуна кыыһым киирэн кэллэ. Дьөгүөссэ сонунун иһитиннэрэбин диэн, хата, мөҕүллэ сыстым ээ. Ис дьиҥин билбэккэ эрэ дьоҥҥо ону-маны кэпсээмэ, сымыйаччы аатырыаҥ диэтэ.

Кыыһым быһаарбытынан, ити сокуон барыла эрэ, күн бүгүн суумата ыйылла илик үһү. Ол иһин даҕаны, ама хайаан, оннооҕор биһиги икки кыбартыырабыт, массыынабыт нолуога холбоон сылга итиччэ буолар быһыылаах. Аны, сууматын хас төбө аайы буолбакка, боруодатыттан тутулуктаах гынаары гыналлар үһү диир. Били, халыҥ хармааннаах, сытыйа байан, харчыларын ханна даҕаны батарар кыахтара суох буолан, араас сыаналаах боруода ыттары иитэр дьоҥҥо аналлаах үһү. Сураҕа, бэтэринээрдэр анал чибы дуу, моонньугар туох эрэ сыыппаралаах тимири дуу кэтэрдиэхтэрэ үһү.

Эмиэ да сөптөөх сокуон эбит. Куорат сиригэр дьиэттэн тахсааккын кытта, ханна даҕаны атаҕы уурар миэстэ көстүбэт гына “миинэ” ууруллубут буолар. Хата, куораттарга эбии, түөрт атахтаах доҕотторун кэнниттэн бакыакка хомуйар курдук сокуон ылыах этилэр. Ыттар таптаабыт сирдэригэр “тахсаллар-киирэллэр”.

Биэтэс БИЛЭЭХЭП, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0