Ыллыыр дьиэ кэргэттэр күрэстэстилэр

Бөлөххө киир:

Өксөкүлээх Өлөксөй аатынан култуура киинигэр “Ырыа аргыстаах олох” диэн ыллыыр дьиэ кэргэттэр куонкурустара аан бастаан ыытылынна. Манна араас улуустартан 17 дьиэ кэргэн кытынна. Сүүрбэттэн тахса сайаапка киирбитэ эрээри, сорохтор кыайан кэлбэтилэр. Кылаан кыайыылааҕынан Нам улууһуттан түөрт аҕастыы-балыстыылар ансаамбыллара таҕыста.

Кыттааччылар иккилии ырыаны толордулар. Бэйэлэрэ айбыт, оҕо эрдэҕинээҕи, киинэттэн эбэтэр норуот ырыатыттан талан ыллыыллар. Нуучча, саха, эбээн омуктар ырыалара дьиэрэйдэ. Бары да олус бэлэмнэнэн, таҥастарын-саптарын оҥостон кэлбиттэрэ бастакы куонкурус таһымын үрдэттэ.

Кыайыылаахтар Нам улууһун Хатырыгыттан төрүттээхтэр. Бииргэ төрөөбүттэр ахсыалар, кыра эрдэхтэриттэн бары ыллыыллар. Ол эрээри, хомойуох иһин, убайдара-бырааттара кыайан кэлбэтэхтэр, ол иһин кэргэттэрэ, оҕолоро өйөөбүттэр. Аҕастыы-балыстыылар бары араас улуустарга олороллор, ол эрээри кыра эрдэхтэриттэн төрөппүттэрэ ырыаҕа, музыкаҕа тапталы иҥэрбит буоланнар, уруккуттан ансаамбыл тэринэн ыллыыллар эбит. Кинилэр куонкуруска Хатырыкка олорор мелодистка Зоя Афанасьевна айбыт ырыатын уонна ийэлэрэ сэрии саҕана суруйбут норуот ырыатын ыллаатылар.

Ансаамбылы салайар Мария Захарова этэринэн, маннык куонкурустар араас сирдэргэ олорор дьиэ кэргэттэри түмэргэ, оҕолору ырыаны, музыканы таптыырга көҕүлүүргэ төһүү буолаллар.

Ырыаны, музыканы таптыыр киһи дууһалыын нарын, кэрэ, куһаҕаҥҥа сыстыбат, үтүөҕэ, олоххо тардыһыылаах буолар. Онон ырыанан оҕону иитии, дьиэ кэргэни түмүү үтүө түмүктээх буолара саарбахтаммат.

Ангелина Васильева, “Саха сирэ” хаһыат, edersaas.ru

Ольга Старостина түһэриитэ.

+1
0
+1
0
+1
0
+1
0
+1
0
+1
0
+1
0