Бу күннэргэ ыраах айан суоппардара кыһыҥҥы таһаҕаһы тиэйиигэ сакаастары хомуйар саамай эппиэттээх кэмнэрэ.
edersaas.ru
Биллэн турар, суоппардар суолталаах боппуруостарын билигин, сайыҥҥы кэмҥэ быһаарыстахтарына эрэ кыаллар суол. «Сыарҕаҕын сайын бэлэмнээ» өс хоһооно этэринии, кыһын тиэйэр таһаҕастарын сакаастарын ыраах айан суоппардара сайыҥҥы кэмҥэ хомуйдахтарына эрэ үлэ тахсыылааҕа биллэр суол. Онон урбаанньыт-суоппардарга өйөбүл буолар СӨ Ыраах айан суоппардарын ассоциациятын салайааччыта Евдокия Дьячковская бииргэ үлэлээһин чэрчитинэн бүгүн кэккэ көрсүһүүлэри тэрийэн ыытта.
Ол курдук, күн бастакы аҥарыгар уопсастыбаннай тэрилтэ салайааччыта ассоциация чилиэннэрин кытта «Анаабыр алмаастара» АУо генеральнай дириэктэрэ Павел Мариничевы кытта көрсөн, бэйэлэрин үлэлэрин хайысхатын, ис хоһоонун билиһиннэрдилэр уонна тэрилтэ тэрийэр куонкурустарыгар кыттыахтарын баҕаралларын биллэрдилэр.
Эбиэт кэнниттэн СӨ Ыраах айан суоппардарын ассоциациятын салайааччыта Евдокия Дьячковская «Арассыыйа иһин» Бүтүн Арассыыйатааҕы норуот фронун салайааччыта Валерий Лютайы кытта уопсастыбаннай тэрилтэ быһыытынан бииргэ үлэлээһин сөбүлэҥин түһэристэ.
Биллэн турар, уопсастыбаннай тэрилтэ дойду таһымыгар туруорсар боппуруоһа үгүһэ чахчы.
Онуоха маннык суолталаах тэрилтэлэр өйөбүллэрэ сүҥкэн. Бииргэ үлэлээһин чэрчитинэн б.дь. от ыйын 4 күнүгэр «ОНФ айан суолугар иниспиэксийэтэ: алдьаммыт суоллар каарталара» диэн бырайыагынан «төгүрүк остуол» ыытыллыаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыска — ассоциация архыыбыттан.