close
Ыраах Индияттан кыайыы көтөллөнөн
Дьулуур - Олох-дьаһах

Ыраах Индияттан кыайыы көтөллөнөн

От ыйын 5—15 күннэригэр Индия Өрөспүүбүлүкэтин Агра куоратыгар Үөрэнээччилэр бойобуой искусствоҕа — каратэҕа, тхэквондоҕа, тустууга, дзюдоҕа —  Бүттүүн аан дойдутааҕы оонньуулара ыытылынна. Онно Роман Дмитриев аатынан олимпийскай эрэллэр училищеларын уонна Сунтаардааҕы оҕо спортивнай оскуолатын иитиллээччилэрэ Александр Авелов, Харысхал Григорьев ситиһиилээхтик кытыннылар.

edersaas.ru


Быйыл ыам ыйыгар Иркутскайга буолбут дойдуга бастыыр иһин күрэхтэһии иккис, үһүс призердарыттан таҥыллыбыт Арассыыйа хамаандата алта судаарыстыба кыттыылаах көҥүл тустуу түһүлгэтин кыайыылааҕынан тахсан, Улахан Кубок хаһаайынынан буолла.  Саха сирин, Дагестан, Алания, Чечня эдэр бөҕөстөрө Араб Эмиратыттан, Индияттан, Францияттан, Кытайтан, Бразилияттан үөлээннээхтэрин илиилээх-атахтаах оҥорботулар, алта кыһыл көмүс, түөрт үрүҥ көмүс мэтээллэри ылан, хаардыы хаамтылар.

Бүгүн «Дохсун» спорт кииҥҥэ буолбут пресс-кэмпириэнсийэҕэ Оонньуулар кыайыылаахтара Александр Авелов уонна кини тириэньэрэ Будимир Яковлев суруналыыстар ыйытыыларыгар хоруйдаатылар. Харысхал тута дьиэлээбит буолан, тэрээһиҥҥэ кыттыбата.

Ньурба тустууга оскуолатын иитиллээччитэ Александр Авелов 42 киилэҕэ диэри ыйааһыҥҥа Агра түһүлгэтигэр Франция, Араб Эмиратын, Индия бөҕөстөрүн баһыйа тутаттаан, чөмпүйүөн үрдүк аатын ылла. Кини үөрүүтүн бастакы тириэньэрэ Иван Бурнашев тэҥҥэ үллэстэр. Оттон Сунтаардааҕы оҕо спортивнай оскуолатын үөрэнээччитэ Харысхал Григорьев 46 киилэлээхтэргэ иккис миэстэни ылла.

Үрдүкү спортивнай маастарыстыба оскуолатын тириэньэрэ Будимир Яковлев Александрдаах Харысхал тустууларынан дойду сүүмэрдэммит хамаандатын тириэньэрдэрэ астыммыттарын, инникитин улахан түһүлгэлэргэ кытыннарыахтарын сөбүн эттэ.

Спорт миниистирэ Георгий Балакшин уолаттарбыт икки сылга биирдэ ыытыллар Үөрэнээччилэр Бүттүүн аан дойдутааҕы оонньууларыгар тахсыылаахтык тустан, икки мэтээллээх эргиллибиттэрин, Арассыыйа хамаанданан түмүккэ бастакы миэстэни ылыытыгар кинилэр үтүөлэрэ эмиэ баарын киэн тутта бэлиэтээтэ, аан дойдутааҕы түһүлгэҕэ бастакы дьоһун ситиһиилэрэ инникитин саҥа кыайыыларга сирдээтин диэн баҕа санаатын эттэ.

Спортивнай тустууга өрөспүүбүлүкэтээҕи федерация толорооччу дириэктэрэ Николай Николаев, Роман Дмитриев аатынан олимпийскай эрэллэр училищеларын дириэктэрин бастакы солбуйааччы Александр Контоев, оҕо спордугар управление салайааччыта Василий Егоров уолаттарга уонна кинилэр тириэньэрдэригэр махтал тылларын эттилэр, харчынан бириэмийэлэри туттардылар.

Роман ПОПОВ, «Саха сирэ» хаһыат. edersaas.ru

Ааптар хаартыскаҕа түһэриилэрэ.

1
0

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/yraah-indiyattan-kyajyy-k-t-ll-n-n/

INSTAGRAM ЛИЭНТЭТЭ

Instagram батыһан бар