Бүгүн Ытык Күөлгэ Былатыан Ойуунускай аатынан Таатта норуодунай тыйаатырыгар дьон-сэргэ толору мустубут.
Бу улуус олохтоохторо Таатта күөрэгэйэ диэн таптаан, кэрэхсээн ааттаабыт ырыаһыттарын Маргарита Васильева «Ырыам ахтылҕана» диэн айар киэһэтигэр ис сүрэхтэриттэн үөрэн-көтөн, эрдэттэн ох курдук оҥостон көрө кэлбиттэр. Быыс аһыллыаҕыттан ытыс тыаһа өрө хабыллан олорбут, хас биирдии нүөмэр уруйунан-айхалынан арыалламмыт.
Көрөөччүлэр: — Күүстээх, кэрэ куолаһынан бииртэн-биир ырыаны ыллаан хас биирдиибит сүрэҕин сүүйдэ, дууһаны абылаата. Дьоллоох эдэр саастарбытыгар эргилиннэрдэ. Олох кэрэтин-күндүтүн, таптал таайыллыбат таабырынын, абылыыр күүһүн барытын бүгүн киэһэ кини ырыатын истэ олорон эргитэ санаатыбыт, улаханнык долгуйдубут. Маргаритаҕа, кэрэ куоластаах ырыаһыкка, улахан махтал, — диэн чахчы да астынан, үөрэн уонна киэн туттан бэлиэтээбиттэр.
Улуус баһылыга Михаил Соров Туора Күөллээҕи реабилитационнай киин үлэһитигэр, ырыаһыт Маргарита Ивановна Васильеваҕа СӨ Бырабыыталыстыбатын бэрэссэдээтэлин солбуйааччы Алексей Дьячковскай илии баттааһыннаах махтал суругу, улуус дьаһалтатын аатыттан эҕэрдэ суругу туттарбыт. Бу дьоро киэһэ ырыаһыкка элбэх махтал тыллар, истиҥ эҕэрдэлэр этиллибиттэр.
Үөрүүлээх киэһэҕэ ырыаһыт доҕотторо, урут бииргэ үлэлээбит кэллиэгэлэрэ, оҕо ускуустубатын оскуолатын оркестра, «Доҕордоһуу», «Кылыыҥкай» үҥкүү ансаамбыллара уо.д.а. кыттыбыттар.
Биһиги корр., «Саха сирэ» хаһыат, edersaas.ru