Кулун тутар 8-9 күннэригэр Дьокуускайга үтүө күн буолан ааста. «Туймаада» ансаамбыл Киров уулуссатыгар турар Камернай кэнсиэртиир саалатыгар СӨ үтүөлээх артыыһа Александр Ушницкай уонна СӨ култууратын туйгуна Эдуард Баланов «Ырыа аргыстаах» диэн бырагыраамаларын дьоҥҥо-сэргэҕэ таһаардылар.
edersaas.ru
Икки күн буолбут кэнсиэркэ эдэр артыыстар айар дьоҕурдарын сэҥээрэр, куоластарын астынар истээччилэр үрдүк таһымнаах толорууларын сөхтүлэр, репертуардарын биһирээтилэр. Бу киэһэ Александр Ушницкай Кирилл Герасимов, Аркадий Алексеев, Степан Васильев уо.д.а, нуучча мелодистарын Игорь Николаев, Владимир Мигуля уо.д.а. ырыаларын ис иһиттэн иэйиилээхтик, үрдүк ситиһиилээхтик толордо.
Эдуард Баланов дьоһуннаах толорууларыгар классическай хабааннаах ырыалар: М.Магомаев репертуарыттан да буоллун, сахалыы Г.Григорян, А.Файрушина айымньыларыттан да буоллун, сонуннук иһилиннилэр, артыыс толоруутун таһыма олус үрдээбитэ дьэҥкэтик көһүннэ.
Кэнсиэркэ уолаттарбыт Мичил Березкин байаанынан доҕуһуолунан үс ырыаны иккиэн толорбуттара соһуччу бэлэҕинэн буолла. Кэнсиэри иилээн-саҕалаан ыыппыт тэлэбиидэнньэ суруналыыһа Георгий Белоусов ылламмыт айымньылар ааптардарын туһунан истээччи сэҥээрэрин курдук кэпсээтэ. Артыыстарга көх-нэм буолан, кэнсиэр ис хоһоонун кэҥэттэ, улаханнык астыннарда. Александрдаах Эдуардка уһуннук үлэлээбит дьиэлэрин «эркиннэрэ көмөлөстө» диэххэ да сөп. Александр уонна Эдуард иккиэн «Туймаада» ансаамбылга үлэлээбит, толорууларын хаачыстыбата чочуллубут артыыстар.
«Туймаада» ансаамбыл уус-уран салайааччыта, СӨ искусствотын үтүөлээх деятеля, үрдүк таһымнаах муусукаан Светлана Иванова уолаттарга муусука эйгэтин киэҥник арыйбыт, толорууларын маастарыстыбатыгар, истииллэригэр чочуйбут киһинэн буолар диэтэххэ, улахан сыыһата суох буолуо. Ону сэргэ, Александрдаах Эдуард Муусука үрдүкү оскуолатыгар СӨ үтүөлээх артыыһа, доцент В.Н.Логиновка үөрэммиттэрэ кинилэр айар үлэлэригэр улахан суолталаах. Ырыа киэҥ эйгэтин абылаҥар ылларан, хас биирдии артыыс бэйэтин суолун буларыгар элбэх өй-санаа, сүрэх үлэтэ эрэйиллэр.
Тапталлаах артыыстарбыт, итиник иэйиилээх, дууһаны сылаанньытар кэнсиэртэргитинэн биһигини, көрөөччүлэри, куруук үөрдэ туруҥ.
Маргарита СОФРОНОВА, «Саха сирэ» хаһыат, edersaas.ru